Nongpoh, Lber 28
Ki nongïalam shnong jong ka Nongrah Pyllun mynta ka sngi ki la pynlong da ka jingïaid paidbah ryngkat ka jingpyrta bad jingthoh ban pynpaw ïa ka jingsngewsih kthang bad ban pynrem jur ïa u runar uba leit ban thombor ïa kawei ka longkmie kaba armet ba la tip kyrteng kum ka Ellana Lyngdoh Mawphlang ha ka step jong ka 19 tarik u Lber, 2025 hajan jong ka kad liengsuiñ kaba don ha Umroi.
Kum ban shu pynkynmaw biang, ka Kong Ellana Lyngdoh Mawphlang ka la shah thombor ha u runar ba la tip kyrteng kum u Kyrshanlang Marngar, uba la pyndonkam da u bilor ‘beer’ ba la pait ryngkat bad u maw kat haduh ba ka la mynsaw jur bad knieh ruh ïa ka pla jong ka. Kane ka la jia katba ka dang leit trei sha katei ka kad liengsuiñ Umroi ha ka por 8:10 baje eiei mynstep kat haduh ba kan da mynsaw jur.
Ha kane ka jingïaid paidbah, la lam khmat da u Rangbah Shnong, Bah P. Dkhar katba na ka liang ki longkmie pat la wan ban ïadon bynta da ka Kong T. Makhroh nalor kiwei-kiwei ki ‘riew rangbah, ki longkmie ki samla bad ki khynnah skul na ki saw tylli ki skul kiba don ha ka shnong Nongrah.
Na ka liang jong u Rangbah Shnong, Bah P. Dkhar lem bad kiwei de ki ‘riew rangbah bad longkmie ki la pynpaw ïa jingpyrshah bad pynrem jur ïa utei u runar uba la nud ban thombor ïa katei ka longkmie kat haduh ba kan da mynsaw jur bad ong ruh ba kum kine ki jingjia ki wanrah ïa ka jingshongsyier ïa ki paidbah nongshong shnong, khamtam ki khyllung khynnah bad ka shnong ka thaiñ hi baroh kawei.
Kitei ki nongïalam ki la buh ruh ka jingkyntu ïa ki paidbah nongshong ba kin kiar horkit-hordang na kum kine ki jait kam kiba wanrah nam sniew ïa ka shnong ka thaw bad ban ai ïa ka jingïatreilang ban rat dyngkhong ïa kine ki kam sniew hapoh shnong ban wanrah pat sa shisien ïa ka shongsuk shongsaiñ bad maham ruh ban leh da kaba tyngeh ïa ki nongleh kam sniew lada lap ha ki sngi ki ban sa wan.
Shuh shuh, kitei ki nongïalam, ki la kyntu ruh ïa ki para nongshong baroh ban don ïa ka jingtylli mlon ban ïakhun tyngeh ban pynduh ïa kum kine ki kam sniew bad ruh ïa ki jingdih pynbuaid kum ka kyiad, u drok bad kiwei de, namar kum ki nongshong ki don ïa ka jingsngewkhia kaba jur halor ka jingsdang kharoi jong ki kam sniew na ka por sha ka por kaba la pynshong syier ïa ki paidbah wat ba kin ïaid ha ki lynti shnong.
