Shillong, Lber 28:
U MDC shimet na Rambrai-Jyrngam, Bah Lurshai Kharbani, u la pyntip ba namar ba ka Khasi Hills Autonomous District Council (KHADC) kam don ïa ka ‘map’ kaba pura ka la pynlong ïa ki sengbhalang na Rilum Garo ban wan buh mawpud ha u pud u sam ka council ha ki shnong kiba dang hap ha Rambrai-Jyrngam Constituency kaba don markhap bad ka Assam bad Rilum Garo.
U Bah Kharbani u la pyntip ïa kane dei haba u ïashim bynta ïa ka jingkylli bynrap ha ka kynta kylli jingkylli ha ka sngi khatduh jong ka dorbar mang tyngka ka KHADC kaba la long ha ka Sngi Thohdieng ba la wanrah da u MDC ka HSPDP na Mawshynrut Bah Sraly Rashir uba la buh jingkylli la ka KHADC ka don ne em la ka jong ka ‘map’.
U Bah Kharbani u la ong ruh ba ka Garo Hills Autonomous District Council (GHADC) ka la don la u pud u sam namar ka la dep buh ïa u mawpud bad u la kyrpad ïa ka Council ban don la ka map ban ym kulmar haba ïatyngkhuh bad ka Assam bad ka Garo Hills.
U Executive Member ba dei peit ïa ka tnad Land bad Development Bah Powell Sohkhlet u la ong ba ka council haduh mynta kam pat don ka ‘map’ hynrei ka don la u pud u sam bad ka council ka sngew donkam, ka EC kan sa shong pyrkhat.
U Executive Member ba dei peit ïa ka tnat Development jong ka Executive Committee, Bah Powell Sohkhlet, u la ong ba u dang mut ka MDC barim ka la tip ïa ki kyndon jong ka ‘tied bad untied scheme’ kaba la pyntrei da ki MDC.
Kane ka jingjubab u Bah Powell ka dei haba ka Kong Grace Mary Kharpuri, MDC ka NPP na Nongskhen constituency ka buh ïa ka jingkylli bynrap ba ka kwah ban tip ïa ki kyndon jong ka 60 percent bad 40 percent jong ka ‘tied bad untied scheme’.
Kane ka jingjubab u Bah Powell ka la pynlong ïa ka Kong Grace Mary Kharpuri ban ïeng biang ba ma ka ruh ka tip bha ïa ka 60 bad 40 percent namar ka kwah ban tip ïoh ba u Executive Member um tip bha ïa kane.
U Bah Powell u la pyntip ki kyndon ka la mih naduh u snem 2021-22 kaba dei ka 60 percent jong ka ‘tied grant’ kaba dei ïa ka umbam, ki paiñkhana bad ka ‘untied’ ka long ïa ki skhim ïingdorbar shnong, lynti ïaid kjat bad kiwei de.
U la jubab ruh ba ka jingsahkut ban pyntrei ïa kine ki skhim ka dei namar ym lah ban pyndap ïa ki jingdonkam ha ka ‘portal website’ ba la buh da ka Sorkar India.
Kane ka jingbuh jingkylli bynrap ka Kong Grace ka dei ba la wanrah ïa ka jingkylli da u MDC ka Mawshynrut constituency Bah Sraly Rashir uba la buh jingkylli ïa ka jingpyntrei ïa ki skhim jong ka 15th finance commission kaba la long ha ka Sngi Thohdieng ha ka dorbar ba khatduh jong ka KHADC.
Na ka liang u Bah Powell u la jubab ba ïa ka ‘tied grant’ jong u snem 2021-22 la pyllait tang ïa ka pisa kaba nyngkong.
U Bah Isynei Hinge u la ïathuh ba ka jaka ri dohkha kaba don ha Lailad ka don haduh saw tylli ki pung bad ki nongtrei ki don 10 ngut.
U la ïathuh ruh ba kane ka pung dohkha ka wanrah khajna tang 2000 tyngka ha u snem 2017 bad ha u 2018 ka wanrah 7,500 tyngka.
Kane ka jingjubab u Bah Isynei ka dei ha ka jingkylli ba la buh da ka Kong R. Khymdeit kaba dei ka MDC na Nongpoh constituency.
U MDC shimet na Laban-Mawprem constituency, Bah Ricky Shullai u la pyntip ba ka don kawei ka longkmie kaba la pynkhreh ban shna noh ïa ka ïing ha Lumparing hadien ba ka la ïoh jingbit na ka Khasi Hills Autonomous District Council hynrei la wan ban pynsangeh noh na ka Meghalaya Urban Development Authority.
U Bah Ricky u la pyntip ïa kane ka jingeh kaba ki paidbah ki ïakynduh ha Lumparing haba u buh ïa ka jingkylli katba dang ïaid ka dorbar mang tyngka kaba la kut ha ka Sngi Thohdieng halor ka jingpyntreikam ïa ka Building Bye laws jong ka KHADC ha sor Shillong.
U la buh ruh ka jingkylli kumno kane ka building bye laws jong ka KHADC ka la shah ban shim jingbit ïa kiba thmu shna ïing ha Lumparing bad ïa kiba sah ha Laban ym shym la shah haba ka hap lang ha kajuh ka constituency.
Haba jubab ïa kane ka jingkylli, u Bah Pynkhrawboklin Kharjahrin uba dei Executive Member, u la ïathuh ba ka Meghalaya Building Bye Laws ka MUDA ka treikam tang ha municipal bad ki scheme area, katba ka KHADC ka treikam tang ha ‘master plan’ ba la ai da ka sorkar jylla, katba ïa ka jingïakynduh jingeh jong ki nongshong shnong kiba shah pynsangeh ban shna ïing ha Lumparing um pat ïoh jingtip eiei haduh mynta.
