Shillong, Lber 30
Ka ophis jong ka Deputy Commissioner ka East Khasi Hills District ha ka sngi Saitjaiñ ka la lum da ka jingïalang ïa ki nongmihkhmat jong ki shnong bapher bapher kiba don ha khappud ka East Khasi Hills,
Ri-Bhoi bad West Jaiñtia Hills District ban ïathir sani bad ban ai jingpynshai halor ka jingthmu jong ka tnat Pynroi Sor ka Sorkar Jylla ban shna ïa ka jaka theh ñiut ne ka Integrated Solid Waste Management Facility ha u Lum Sohlait uba don ha ka shnong Nonghali.
Lah ban pynkynmaw ba dang shen ki paidbah nongshong shnong ki la mih ban pyrshah ïa ka ‘Public Hearing’ ha kaba ïadei bad ka jingthmu ban shna ïa ka jaka theh ñiut jong ka Shillong Municipal Board (SMB) ha u lum Sohlait ha ka shnong Nonghali.
Ka Deputy Commissioner jong ka East Khasi Hills, Kong RM Kurbah haba kren sha ki lad pathai khubor hadien ba la wai ka jingïalang ka la ong, “Ha ka jingshisha ka la don jingthmu ban pynlong ïa ka public hearing ha ka 2 tarik, Ïaïong, 2025 da ka Meghalaya State Pollution Control Board hynrei namarba ka la don ka jingpyrshah ngi la hap ban khot shwa da ka jingïalang bad ki shnong bad ynda ngi la sngap ïa ka sur jong ki nongïalam shnong ka long kaba shong nia namar ba ki shnong ki ban shah ktah na kane ka projek ki kham bun.”
“Ngi la pynshai bad ngi la pynsngewthuh ïa ki bad la rai mynta ban leit sha ki shnong ban ai jingpynshai bad hadien shi bnai ngin sa ïakynduh biang bad ïa ka public hearing kan sa long ynda ki paidbah ki la sngewthuh ïa ka jingmyntoi jong kane ka projek,” ka la ong.
Ka la pyntip ba ki nongïalam shnong kiba la ïoh jingpynshai na kane ka jingïalang kin sa leit ban pynsngewthuh sha ki nongshong shnong ha ki shnong jong ki.
Haba kylli, ka Kong Kurbah ka la ong, “Kumba ju long ka rukom haba wan kino-kino ki projek jong ka Sorkar, ki ju ïasoi ïa ka Memorandum of Understanding (MoU) bad ka tnat Urban Affairs kan sa soi ïa ka soskular bad ki nongshong shnong ba kin long ki nongpeit pyrman khnang ba lada don ka jingdkoh ha ka jingpyntreikam ïa ka projek yn sa ïoh ban ïathir biang.”
U President jong ka Synjuk Nongsynshar Shnong Bah Super Rngaid haba pynpaw halor ka jingïakren ha ka jingïalang, u la ong ba kum ka Synjuk ka dang don hapdeng ka jingartatien namar ba manla ki projek ba la wanrah da ka Sorkar kim ju urlong katkum ba la pynpaw ha ka kot sada.
“Ngi la ïohi ïa ka jingpynbna kaba ong da kumwei katba ynda la pyntreikam ïa ki skhim ne ki projek kim ïahap dur satia. Ngi la batai ba ngim lah ban shaniah ïa ka Sorkar bad dei ïa kata ka jingartatien ba ki la ai jingpynshai ïa ngi,” u la ong.
“Ngi la shim ruh ïa ka rai ba ka dei ban don shwa ka jingïathir ïatai bad ka ophis jong ka DC kan sa shna da ka Whatsapp Group ban ïakren halor kane mat. Ngi la dawa ruh ba ka dei ban don ka jingïamynjur shwa ban pyntreikam ïa ka projek namarba khlem ka jingïasoi ïa ka soskular ngin ym ailad satia ïa ka projek ban pyntyllun shakhmat,” la ong shuh shuh u Bah Rngaid.
Katkum ka jingïathuh jong u, ka jingpyrshah jong ka Synjuk ka long halor ka nongrim ba ka jaka ba la tyrwa ban shna ïa ka jaka theh ñiut ka don shajrong jong ka Wah Umkhen kaba ju bsa um palat 15 tylli ki shnong.
“Ngim kwah ban ïohi ba kane ka projek kan pynjaboh ïa ka wah Umkhen,” la ong u President ka Synjuk bad bynrap, “Ka jingleh jong ka Sorkar ka long ka bym lah ban pdiang haba buh ïa ka jaka thehñiut namarba ym shym ka pyntreikam katkum ka aiñ bad kan buh jingeh ïa ngi hi ki paidbah kiba shong basah hajan ka jaka thehñiut.”
U la ïathuh ruh ba ka Synjuk ka la dawa ba shwa ban sdang ïa ka projek ka Sorkar ka dei ban ïasyllok, ban pynshai ban ïathir bad ban ïatai sani bha.
