Shillong, Lber 31
Ka Krishi Vigyan Kendra (KVK) East Khasi Hills kaba hap hapoh ka tnad Agriculture and Farmers Welfare, Meghalaya bad ka ICAR-ATARI Zone VII ka la pynlong ïa ka jingïalang kaba shi sngi ban pynsngewthuh paidbah halor ka aiñ PPV&FRA, 2001 na ka bynta ki nongrep kiba dei na ki distrik bapher-bapher jong ka Jylla ha ka taïew ba la dep ha KVK East Khasi Hills, 5 Mer, Upper Shillong.
Ha kane ka sngi la pynlong ruh ïa ka jingpyninam ban pyni ïa ki jait jingthung kiba kyrpang ha ka Jylla da ka KVK West Khasi Hills, KVK Jaiñtia Hills bad ka KVK Ri-Bhoi, ka Institute of Bio-resources & Sustainable Development (IBSD), ka ICAR-Central Potato Research Station nalor kiwei.
Ki stad saian kiba la shah khot sngewbha na ka bynta ki ‘technical session’ ki kynthup ïa kito kiba na ICAR-NEH, IBSD, ICAR-CPRS bad KVK East Khasi Hills kiba la ïasam ïa ki jingshem jong ki halor ki phang bapher-bapher ryngkat ka jingpyrkhat kyrpang ïa ka jingpyndonkam, jingpynneh-pynsah bad ka jingbuh jingthoh ïa ki jingthaw bariewspah jong ka Jylla.
Ha kajuh ka por, la sam ïa ki mar rep sha ki nongrep jong ka East Khasi Hills ba la kyrshan da ka ICAR- National Bureau of Agriculturally Important Micro-organism (NBAIM), Mau, Uttar Pradesh hapoh ka NEH Component.
Ha ka jingïalang plie ïa ka prokram, u Bah B.K. Sohliya, Chairman i/c, Meghalaya Farmers (Empowerment) Commission u la long u kongsan bad ha ka jingkren jong u la pynpaw ïa ka jingdonkam ban pynrung kyrteng ïa ki jait jingthung kiba la rep da ki nongrep ka Jylla hapoh ka aiñ PPVFRA bad ai mynsiem ïa ki nongrep bad ïa ki KVK ban ïatrei shitom lang ban ithuh bad pynbiang ïa ki jingthoh kiba ïadei bad kine ki jait jingthung kiba don ha ka Jylla.
U la ban jur ruh halor ka jingdonkam ban pynshlur ïa ki nongrep jong ki thaiñ nongkyndong sha ka seng kam seng jam da ka jingmut kaba shai halor ka jingpynwandur ïa ki mar jong ki.
Ïa u Kongsan la synran lang da u Dr. A.K. Mohanty, Director ka ICAR-ATARI Zone VII, Umïam kum u Symbud Kongsan badon burom ryngkat bad kiwei ki ‘riewshemphang jong ka Jylla. Haba kren ha kane ka sngi u Dr. A.K. Mohanty u la ban jur halor ka bynta ba ki KVK kin long ka tyndong jingshai na ka bynta ban pynphriang ïa ka teknoliji sha ki nongrep.
U la kren halor ka jingdonkam ban pynwandur ïa ki rukom rep bad ri-jingri lane kata ka ‘IFS Model’ lyngba ka jingbuh jingmut ïa ka jingpynwandur ïa ki Micro bad Mini IFS Model ha ki KVK bad ka lyngkha jong ki nongrep.
U la kdew ba ka ICAR-ATARI ka la ithuh bad seng 2 tylli ki ‘agri-incubation centre’ ha ka Jylla na ka bynta ban btin kti bad ban pynsuk ïa ki nongseng kam ha ki thaiñ nongkyndong. U la ïasam ruh ïa ka jingdonkam ban pynwandur ïa ki KVK kum ki jaka ‘test’ ïa ki jait jingthung ban pynrung kyrteng hapoh ka aiñ PPVFR.
Ha kane ka sngi la pyllait paidbah ruh ïa ka kot lyngkdop kaba la ai kyrteng “Khyndiat Ki Jingtip Shaphang Ka Hok U Nongrep Hapoh Ka Aiñ Protection Of Plant Varieties And Farmers’ Rights Act, 2001” kaba la pynmih da ka KVK East Khasi Hills na ka bynta ka jingmyntoi jong ki nongrep. Kane ka long katkum ka kyrwoh na u Bah L.V. Khonglah, Senior Scientist and Head KVK, East Khasi Hills.
