Babu Kular Khongjirem
Dang shen, ka Sorkar MDA-II ha Meghalaya hapoh ka jingïalam jong ka NPP ka la rai (lyngba ka Cabinet Meeting) ban pynkiew noh ïa ka shuti Casual Leave (CL) na ka 15 sngi sha ka 30 sngi ha ka shi snem na ka bynta ki nongtrei Sorkar bad ki Public Service Under-taking (PSU) kiba trei-kam hapoh ka Sorkar Jylla.
Ha ki por kiba la dep, ka Sorkar ka ai bad shah ban shim shuti (CL) tang hapoh 15 sngi ha ka shi snem ïa kino kino ki nongtrei ba la siew tulop da ka Sorkar. Lada ki shim palat nangta, kin hap ban leh da kiwei pat ki jait shuti katkum ka jingïa pynbeit bad jingïa sngewthuh jingmut lang bad ki Head jong kito ki Department ba ki trei ne ki Head jong ki institution. Katei ka shuti (CL) ka treikam lang kumjuh salonsar (uniform applicable) wat ïa ki nonghikai skul kiba hap hapoh ki deficit system.
Ha kine ki shiphew snem tam mynta, kata, hadien ba la pyntreikam ïa ka 5th Meghalaya Pay Commission, ka Sorkar Meghalaya ka la pynkiew ïa ka shuti ïoh khun (maternity leave) ïa ki longkmie na ka 3 bnai sha ka 6 bnai. Wat ïa ki longkpa (paternity leave) ruh ki ïoh shuti lem haduh 15 sngi eiei ha ka por ba kha khun ka kmie khun jong ki. Hynrei, kaba lyngngoh pat ka long ba, katei ka shuti kam treikam satia (not applicable) ïa ki nonghikai skul hapoh ka deficit system. Ka Office Memorandum jong ka Sorkar Meghalaya ka la thoh shai ba katei ka Office Memorandum jong ka Sorkar Meghalaya kam treikam (exemption) ïa ki nonghikai kiba hikai ha ki skul deficit wat la ka Service Rule (2018) jong ki nonghikai ba ïoh jingsiew na ka Sorkar (Govt. aided schools) ki la thoh ban ïoh lang kumjuh ïa ki nonghikai ba la siew tulop lang ka Sorkar. Kane ka long kum ka jingleh shiliang khmat (partiality) bad jingibeiñ ne jinglehbeiñ (discrimination) na ka liang ka Sorkar ïa ki nonghikai hapoh ka deficit system. Tip kane ka CL ba 30 sngi ba ka Sorkar ka la rai mynta kan treikam (applicable) ne em ïa ki nonghikai kiba hap hapoh deficit skul. Ka official notification jong ka Sorkar ka dei ban thoh shai kdar ba ka kynthup lang (including) ïa ki deficit skul, lym kumta, ki bor pynïaid skul kin artatien ban pyntreikam ïa katei ka rai.
Katei ka rai jong ka Sorkar ka kren shai tang ïa ki nongtrei kiba kwah shim shuti kin ïoh shuti pahuh ei haduh 30 sngi ha ka shi snem. Hynrei, ïa kito pat kiba minot thop ban leit trei khlem shim shuti, kumno ka Sorkar kan pyrkhat halor jong ki? Ha ka jingshisha, lada ki nongtrei kin wan tista khlem pep sha ki kam ba ki trei, ka dei ruh ban ai jingïaroh, ai mynsiem, ai prize ne ai award kum ka jingpynshlur (incentives) khnang ba kan long ruh ka nongmuna ïa kiwei ki nongtrei. Ka Sorkar ka dei ban pyrkhat ruh ïa ki ‘riew minot ba wan tista (regular) sha ka kam jong ki, namar lada ki wan tista, kan long ruh ka jingmyntoi ym tang ïa kato ka ophis ba ki trei, hynrei ïa ka roi ka por jong ka Jylla bad ka ri hi baroh kawei.
