Shillong, Ïaïong 01
Ka Sorkar Jylla ka la pynsangeh noh shwa shipor ban ai ‘license’ thymmai na bynta ban plie ïa ki dukan kyiad phareng (IMFL) lane ‘wine store’ bad ki ‘bonded warehouse’. Kane ka jingpynsangeh jong ka Sorkar ban ai ‘license’ thymmai ka dei ruh hapdeng ka jingkhñium jong ki trai dukan kyiad ba la don lypa naba ka jingdie ka la hiar arsut namar ka jingkharoi ki dukan kyiad thymmai.
Haba pyntip ïa kane, u Myntri ba khmih ïa ka tnat Excise, Bah Kyrmen Shylla, u la ong ba ka tnat ka la pynsangeh shipor ban ai ‘license’ thymmai ban plie ‘wine store’ bad ‘bonded warehouse’ kat bym pat pyntreikam da ka lynti bathymmai ban pynbeit ryntih ïa ka rukom ai ‘license’.
“Ngi la pynsangeh ban ai ‘license’ ïa mynta shipor. Ngin sa wanrah ïa ka lynti treikam bathymmai. Ngin sa sdang ban ai ‘license’ tad hadien ba la pynlong ïa ka jingwad bniah kaba sani bha”, la ong u Myntri haba kren bad ki lad pathai khubor ha ka Sngi Ba-ar.
Katkum ka jingong u Bah Kyrmen, ka tnat ka la pynlong ïa ka jingwad bniah ban tip hangno donkam ban pynbun ïa ki dukan kyiad bad hangno donkam ban sangeh noh.
U la ïathuh ba ïa kane ka rai la shim hadien ka jingïoh pdiang ïa ki jingujor na ki trai dukan kyiad ba kim ju lah die bha shuh namar ka jingdon bun palat ki dukan kyiad.
“Halor kane ka jingujor, ngi la pynsangeh ban ai ‘license’ thymmai. Ngin wad bniah shwa bad hadien ngin sa ïaid shakhmat ban ai ‘license’ thymmai. Lada ngi shem ba ki dukan kyiad ki duna bha ha kino-kino ki jaka hynrei ka jingdie ka bun ngi kwah ban ai ‘license’, hynrei ngim lah ban shu ai beit tang ba la don lut ki kot ki sla kiba donkam”, u la ong.
Halor ki dukan kyiad ba don marjan ki jaka pule bad jaka mane blei, u Myntri u la ong ba ka tnat kan sa khmih bniah ïa kane ka kam bad ka Sorkar ka lah ban bishar biang lada don ka jingujor.
U la ong ba ïa ki ‘license’ la ai haba pynshong nongrim na ka NoC ba la ai da ki Rangbah Shnong.
