Shillong, Ïaïong 04
Ka IIM-Shillong ha ka Sngi Thohdieng ka la rakhe ïa ka ‘Annual Convocation’ kaba 16, kaba long ka sngi kaba kongsan ha ka samoi pule jong kane ka shlem ai jinghikai.
Ha kane ka jingïalang, la sakhi ïa ka jingpynkup kyrdan pule sha 475 ngut ki samla kiba la pyndep ïa ki jingpule bapher-bapher, ba kynthup ïa 381 ngut na ka Post Graduate Programme (PGP) 2023-25 Batch, 54 ngut na ka Post Graduate Programme for Executives (PGPEx) 2024-25 Batch, bad 35 ngut na ka Post Graduate Programme for Working Executives (PGPWE) 2023-25 Batch.
Nalor kine, 5 ngut ki ‘riewshemphang ki la shah pynkup da ka kyrdan ‘Doctor of Philosophy’ (PhD).
Ha kane ka ‘Convocation’ la donlang u Myntri Rangbah ka Jylla, Conrad K. Sangma kum u Kongsan, bad u President ka Honeywell India, Ashish Modi kum u Symbud Kongsan.
Haba ai jingkren ha ka jingïalang, u Sangma u la ai jingïaroh halor ka ïoh ka kot ka India kaba lah ban ïeng skhem bad kiew sted. U la pynpaw wat hapdeng ki jingeh ha ka pyrthei kum ka jinghiar ka ïoh ka kot, ka India ka ïai bteng ban prat lynti ha ka liang ka jingkiew kaba khlaiñ, kaba la ïalam da ki jingthmu ba wanrah jingkylla kum ka ‘Digital India’.
U la ñiew ïa ka India kum ka ri kaba kiew stet ha ka ïoh ka kot ha ki shiphew snem bad pynshlur ïa ki samla pule ban pyndonkam hok ïa ka jingpule jong ki na ka bynta ka jingkiew jong ka ri.
“Phi don ha kawei na ki kylla kaba don jingkyrmen tam jong ka roi ka kiew ka India. Da ka jingkut jingmut bad ka jingtbit, phi lah ban wanrah ïa ka jingmanbha kaba neh,” u la ong.
Na ka liang u President ka Honeywell India, Ashish Modi u la ai khublei ïa baroh ki samla kiba la pyndep ïa ka jingpule bad ïasam ruh ïa ki san tylli ki jinghikai ba kongsan ha ka jingim.
Nyngkong eh, u la pynshlur ïa ki samla pule ban trei shitom, da kaba pyntikna ba ka jingjop kan bud hadien.
Ha kajuh ka por, u la ban jur halor ka jingdonkam ban kren shai bad ai jingmut ïa ki samla pule ba kin ym long ki nongleit-nongwan ha la ka jong ka jingim.
U la kyntu ruh ïa ki ban buh ïa ka thong bad ban long kiba tbit tam ha kano-kano ka kam kaba ki jied ban leh.
Shuh shuh u la ban jur ïa ka bynta kaba kongsan jong ka jingïakylliang jingtip kaba tikna ïa ka jingroi ha ka kam bad ka jinglong shimet.
Nalor kane, u la pynpaw ïa ka jingdonkam jong ka koit ka khiah-ha ka met ka phad bad ha ka jingmut-jingpyrkhat-kum ka nongrim na ka bynta ka jingim bad ka kam kaba pynhun.
Hashuwa, ha ka jingkren pdiang, na ka liang u Chairman of the Board of Governors, IIM-Shillong, Shishir Kumar Bajoria, u la ai khublei kyrpang ïa ki samla pule kiba la pyndep ïa ka jingpule bad ïa ki bahaïing bahasem jong ki.
U la ai khublei halor ka jingaiti, ka jingminot bad ka jingtrei shitom jong ki ha baroh kawei ka samoi pule jong ki.
Haba kdew ïa ka jaiñ phong kaba la shna pynwandur na ka ‘Ryndia’ ba la pynmih ha ka thaiñ-kaba dang shen ka la ïoh ïa ka jingithuh ‘Geographical Indication’ (GI) ‘Tag’-u la kdew ba ka pyni ïa ka jinglah ban ïakhun bad jingriewspah kolshor jong ka Thaiñ Shatei Lam Mihngi.
