Shillong, Ïaïong 06
Ka jingdon jong ki khynnah pule kiba la poi sha ka thong ha ka eksamin Secondary School Leaving Certificate (SSLC) mynta u snem ka long 87.10% – kaba la kiew shi kat dei haba ïanujor bad ki snem ba la leit.
Ïa ka risol jong kane ka eksamin kaba la pynïaid da ka Meghalaya Board of School Education (MBoSE) la pynbna ha ka Sngi Saitjaiñ.
Haba phai sha ka jingdon jong ki khynnah pule kiba wan ha ka kyrdan ‘Top Twenty’ kane ka la kiew shi kat dei, kata sha ka 85 ngut mynta u snem, haba ïanujor bad ki 37 ngut jong u snem ba la dep – kiba wan ha kane ka thup kyrdan ki kynthup ïa kito ki khynnah pule kiba na sor bad nongkyndong kumjuh, ha kaba ki don ruh katto-katne kiba la ïasam lang ïa kajuh ka kyrdan.
Kine harum ki long ki jingkren na katto-katne ngut ki khynnah pule kiba la wan ha ka kyrdan ‘Top 20’ na Ri-lum Garo.
Kyrdan ba 2: Pori Pandey – JN Higher Secondary School, Phulbari
Ka khun jong u nongdie dukan bad ka kmie ba shong-ïing, ka Pori Pandey, kaba la wan ha ka kyrdan ba-ar ha ka risol SSLC kaba dang shu dep pynbna, ka la pynpaw ïa ka jingsngew donbok bad jingsarong na ka liang jong ka.
Ka la pynsngew ba ka dawbah jong ka jingjop ka dei ka jingkyrshan jong ka ïing ka sem, kynthup ïa u kpa-ieid jong ka lem bad ki nonghikai na bynta ka jingkyrshan bad jingai jingmut jong ki.
“Haba nga don kano-kano ka jingartatien, kim shym la peit ïa ka por hynrei ki la ai ka jingïarap jong ki. Dei ki bahaïing bahasem bad ki nonghikai kiba ïalam lynti ïa nga. Nga la pule kot ym duna ïa ka 13-14 kynta khlem kano-kano ka jingkhuslai bad baroh kane ka dei namar jong ki. Mynta ka thong jong nga ka long ban long doktor – kaba tbit bad ba paw khnang ba ngan lah ban shakri ïa la ka ri kumjuh” ong ka Pori.
Kyrdan ba 5: Mahir Islam – Mahendraganj Higher Secondary School
U khun ba marwei jong u nonghikai, u Mahir u la sngewkmen shi kat dei halor ka risol jong u.
Da kaba ai burom ïa u kpa na bynta ka jingjop jong u, u Mahir u la ong ba u la buh por haduh 8-10 kynta man ka sngi ban pynkhreh ïa ka SSLC. Da kaba buh thong ban long doktor, u Mahir u la ong ba u thmu ban leit pynïasoh bad ka Ajmal Foundation ha Hojai, Assam ban bteng ïa ka jingpule jong u.
Kyrdan ba 6: Bathseba Ch Sangma, St Xavier’s School – Tura
Ka Bathseba ka sngew ba ka jingshaniah ha lade bad U Blei ki long kiei-kiei ban kynjoh ïa ka thong jong ka jingjop.
Ka la ong ba ka kwah ban bteng ïa ka jingpule haba ïadei ka kam sumar bad ka jingbuh hakhmat eh ïa ka jingpule, ka la ïarap shibun ban kheit ïa u soh ka jingjop. Ka la ai burom shuh-shuh ïa ki nonghikai, ki kmie ki kpa lem bad ki paralok jong ka na ka bynta ka jingjop kaba ka la ïoh.
Kyrdan ba 8 – Trishita Koch, Embee Rosebud School – Tura
Ka Trishita ka la ong ba ka la ïoh mynsiem na ki khynnah pule ba la kham heh ïa ka ban leh bha ha ki eksamin SSLC mynta u snem. Kane ka la pynlong ïa ka ban ïakhun tyngeh ban ïoh ïa ka risol kaba bha.
“Nga la ïoh ka jingkyrshan kaba khraw na ki kmie ki kpa, ki nonghikai bad Principal ka skul. Ban ïoh ïa ki ‘mark’, donkam ban trei shitom bad ban don ha ka basa jinglong-jingman kaba bha. Nga la aiti 4-5 kynta ha ka jingpule man ka sngi hynrei nga la leh ïa kata ha ryngkat ka jingshimkhia bad jingpynleit jingmut. Nga la pynlut por ruh ha ki kam ha skul ban pynneh ïa ka jingmut-jingpyrkhat,” ka la ong.
Ka Trisha ka la ong ba ka kwah ban long ka heh ophisar Sorkar ne ‘Civil Servant’ hadien-habud.
Kyrdan ba 9 – Abu Toufique Elahi Mondal (JN Higher Secondary School)
U Toufique u la pynpaw ïa ka jingkmen halor ka risol jong u bad ai burom ïa la ka longïing bad ki nonghikai kiba u la ong ba ki la noh synñiang shi kat dei na bynta kaei kaba u la kynjoh.
Ha shuwa ka eksamin, u la pynlut por palat 10 kynta man ka sngi bad mynta un bteng ïa ka jingpule ha ka tnad pule ‘Science’ shuwa ban ïakhun pat ïa ka UPSC.
