Shillong, Ïaïong 09
Ka jingwad ba ïatreilang ba kynthup ïa ki pulit ka Jylla, ki kynhun pyllait im, ki Home Guard, lem bad ki nongshong shnong ka dang ïaid shakhmat ban lap ïa u Puskas Zsolt, u nongjngoh kai pyrthei na Hungary, uba la jah rngai naduh ka 29 tarik u Lber ha ka thaiñ Sohra.
Katkum ka khubor na ki pulit, la ong ba ïa u Zsolt la ïohi khatduh da ki trai shnong hajan Mawkawir bad Ramdait.
Halor kane, na ka liang ka Embassy jong ka Hungary ka la ujor da ka jingujor jah rngai sha ki bor ba dei khmih ha ka 2 tarik u Ïaïong.
U SP ka East Khasi Hills, Bah Vivek Syiem u la ong ba u Zsolt u la pynrung kyrteng ïalade ha kawei ka ‘Hotel’ kaba don ha Laitumkhrah, Shillong, ha ka por kumba 3:45 mynstep ha ka 29 tarik u Lber.
Hadien kata, ha kane kajuh ka step, ha ka por kumba 9 baje eiei, u la mih na ‘Hotel’ bad wai ïa kawei ka taksi kaba la leit buh ïa u sha Mawsahew hajan Sohra ha ka por mynsngi.
La ïathuh ba u Zsolt, u la mih noh marwei na katei ka jaka, da kaba rah tang ïa ka pla kit, da ka jingthmu ban ïaid kjat lyngba ka Mawkawir sha Nongriat.
Naduh ba u la mih noh ha ka 29 tarik, ym shym la don kano-kano ka jingïakren bad u Zsolt.
Haba ïadei bad kane ka jingjia, la sdang ïa ka jingwad bniah kaba ïatreilang, ba kynthup ïa ki pulit, Home Guard bad ki nongshong shnong ka thaiñ.
Ha kajuh ka por, la pyndonkam ruh ïa ki ‘drone’ kum shi bynta ban ïarap lang ha ka ban wad ïa u Zsolt.
“Ka jingwad ka dang ïaid shakhmat,” la pyntip u SP da kaba bynrap ba ïa ka krem Mawkawir bad ki lynti ïaid kjat sha Nongriat la dep ban wad bha.
Hynrei haduh mynta, ym pat lap ksai ïa utei u nongjngohkai pyrthei uba la jah rngai.
Ki bor ba dei khmih ki ïai bteng ban nang pynjur shuh-shuh ïa ka jingpyrshang jong ki, ha ryngkat ka jingkyntu ïa kino-kino kiba don jingtip shaphang u Zsolt ban wan shakhmat.
