Shillong Ïaïong 10
Ki nongshong shnong jong ka Mawkynrew bad ka Mawleiñ ha ka sngi Palei, ka 10 tarik u Ïaïong, 2025, ki la leit tur sha thanat Madanrting, halor ka jingshah khot hajir jong 10 ngut ki nongshong shnong, ba kynthup ïa 8 ngut ki rangbah bad 2 ngut ki longkmie.
Ka jingshah khot hajir jong kitei 10 ngut ki nongshong shnong ka Mawkynrew bad Mawleiñ ka dei halor ka jingjia ha ka 20 tarik u Kyllalyngkot 2025, kaba la ïaid lai bnai mynta, ha kaba kitei ar tylli ki shnong ki la leit tur sha Umjar ban pyrshah bad pynsangeh ïa ka jingpyntrei ïa ka skul Ram Krishna Mission kaba ki la kynnoh ba la tei khlem ïoh jingbit na ka shnong da kaba kynnoh ba u Acting Sordar ba mynta u la ai ïa katei ka jaka khlem pyntip sha ki nongshong shnong jong ki ar shnong.
Ka jingleit tur paidbah na kitei ar tylli ki shnong sha katei ka jaka ba shna ïa ka skul Ram Krishna ka la mih ruh ka jingkulmar bad ïa ktah kti hapdeng ki nongshong shnong bad ki pulit. Kumta na ka liang ki pulit ka Madanrting ha ka sngi Palei ki la khot hajir ïa kitei 10 ngut.
Ha kane ka sngi shah khot hajir, ki pulit ki la wan ban khot ïa ki kyrteng ban phah rung iwei hadien iwei pat, hynrei ki paidbah kim shah da kaba ong ba “Ngi don lut hangne ngin rung lang beit baroh shapoh.”
Kumta hadien ba ki paidbah jong kitei ar tylli ki shnong ki la pyneh triang ban rung beit baroh 10 ngut ha kajuh ka por, ki bor pulit ki la shah ïa ki ban rung baroh shapoh ban tian bishar.
Ha ka jingïakren bad ki lad pathai khubor hadien ba la dep mih na thanat, na ka liang u Bah Phrangstarwel Wankhar u la ong, ba ki pulit ki la pynngat shibun ki kyndon pyrshah ïa ki, hynrei u la ong, ba lada ki pynngat shispah tylli ruh kin ym tieng ïa ka jingshisha.
U la ong, ba ki pulit ki la kylli ha kaba ïadei bad katei ka jingjia ha Umjar kaba ki la leit tur ban pyrshah ïa ka jingshna ïa ka skul Rama Krishna Mission khlem da ïoh jingbit na ka shnong bad ki kylli ba balei ki leit ban pynkulmar ha katei ka sngi, ha kaba u la jubab ba mano ba pynkulmar nyngkong?
U Bah Phrangstarwel u la ong ruh, ba lada ki pulit kin khot biang ban ïakren ïa kajuh ka mat kin ym wan shuh namar kam myntoi haba ki la wan ban pynshai lut baroh ha kane ka sngi.
Nalor kata u la ong, ba ha ka mukotduma ba la mudui pyrshah ïa u la kdew, ba ma u ruh u la donkti lang ban ai ïa katei ka jaka sha ka Rama Krishna Mission, hynrei u Bah Phrangstarwel u la buh ka jingkylli bad pan jingshai na u Secretary ka Rama Krishna Mission ba un ai ka jingpynshai, mynno u la donktilang ha kane ka kam. Kumta u Bah Phrangstarwel kum u nongïalam jong ka sur ki paidbah, u la sait khuid ba um shem la donkti eiei ruh.
Ha kajuh ka por u la ong, ba baroh ki nongshong shnong ki pynrem ïa u Syiem namar naduh mynno la dep ban dawa ban weng noh ïa une u Acting Sordar namar la shiphew snem mynta u la long kum u Acting Sordar bad ki kwah ban ïoh noh ïa u Sordar bapura, hynrei kaba pyning khong ïa ki paidbah ym tang ba katei ka jaka, hynrei u Syiem u la pynmih ka jingthoh, ba ka jaka ka khyndew kaba dang hap ha Mawkynrew Pyllun, kynthup ïa ka Mawleiñ ka dei jong ki kur Mukhim bad kam dei jong ki paidbah, kane ka la nangpynsat shuh shuh ïa ki paidbah namar wat ki kur Mukhim ruh kin hap thied ka khyndew ka jaka na kiwei pat ki kur, katba u Syiem u ong ba ka dei jong ki Mukhim.
U la ïathuh, ba haduh mynta ïa katei ka jaka ba shna ïa ka Rama Krishna Mission ki dang phah trei beit.
