Shillong, Naiwieng 15
Ka tamasa Wangala kaba 50th Hundred Drums ka la rung ha ka Guinness World Records da kaba tem 1000 tylli ki ksing ha ka Golden Jubilee jong ka.
Ka jingrakhe ïa ka Golden Jubilee kaba 50 jong ka tamasa Wangala kaba la pynkut ha ka sngi Saitjaiñ ha Garo Heritage Village, Wangala A·dam, Chibragre, West Garo Hills, ha kaba ka Hundred Drums Wangala Festival Committee, India, ka la ïoh ban khur ïa ka nam Guinness World Records kum ka Wangala kaba heh tam.
Palat 1,000 ngut ki nongtem Dama tynrai ki la ïa shimbynta lang ha ka Rhythm of Thousand Drums, ryngkat bad ki kynthei nongshad bad ki shynrang, bud sa ka jingshad Wangala kaba kyrpang na ka bynta ka jingpyrshang ban buh rekod. U nongbishar jong ka Guinness World Records u Richard Williams Stenning na United Kingdom u la pynbna ha katei hi ka jaka. Ka kynhun kaba don 12 ngut na Garo Hills ka la ïashim bynta ruh ban bishar ïa kane ka jingshad.
Ïa kane ka jingïalang pynkut la pynkup burom da u Gajendra Singh Shekhawat, Myntri ka tnad riti dustur bad jngohkai pyrthei ka Sorkar India, kum u kongsan, ha ryngkat ka jingdon lang u Conrad K Sangma, Myntri Rangbah ka Jylla Meghalaya, Bah Sniawbhalang Dhar uba long u Symbud Myntri Rangbah ka Jylla; u Timothy D Shira, Myntri ka Sorkar bad u Dr. Mukul Sangma, Nongïalam ka Liang Pyrshah, ki la ïadonlang kum ki kongsan ryngkat bad kiwei ki riew rangbah.
Ha ka jingkren jong u Myntri ka Sorkar Pdeng u la pynsngew ïa ka jingai khublei na ka bynta u Myntri Rangbah bad ki paidbah ka ri India halor ka jingdap sanphew snem jong kane ka tamasa. U la batai ïa ka Wangala kum ka jingpynpaw ïa ka jingsngewnguh ïa ka mariang na ka bynta ka jingot kaba bun, u la kdew ïa ka jinglah jong ka Wangala bad ka Garo Hills na ka bynta ka kam jngohkai pyrthei bad ka jingim na ka bynta ki samla trai ri, bad pynpaw ïa ka jingkwah jong ka Sorkar Pdeng ban kyrshan ïa ka Jylla ha kaba kyntiew ïa ka thaiñ kum ka jaka jngohkai pyrthei.
U Myntri Rangbah ka Jylla u la ai khublei ïa u Myntri ka Sorkar Pdeng, ki nongpynïaid bad ki nongshad, bad pynkynmaw ba kane ka tamasa kaba la sdang naduh u snem 1976 da ki 20 tylli ki jingtem bad kiew sha ka 100 tylli, mynta ka la kot sha ka 1000 tylli ki tyndong ha ka Golden Jubilee jong ka, kaba pynurlong ïa ka jingangnud jong u P. A. Sangma ba la khlad noh. U Myntri Rangbah bad u Nongïalam ka Liang Pyrshah ki la ai khublei ruh ïa ka imlang sahlang kaba la lah ban pynneh pynsah ïa kane ka tamasa ha kine ki sanphew snem.
Ha kane ka sngi la pynlong ruh ïa ka jingïakop shad hapdeng ki shiphew tylli ki kynhun shipai. La pynbna ïa ka Chidaogre kum ka nongjop bad la ïoh ïa ka trophy bad ka song pisa kaba T.2 lak; u Gondenggre u la wan ba ar ha kaba u la ïoh khur ïa ka trophy bad T. 1.5 lak bad ka Sadolbra ka la long kaba ar da ka trophy bad T.1 lak. La ai khusnam pyntngen sha baroh ki kynhun kiba ïashim bynta.
Ka bor synshar District, West Garo Hills, ka pynpaw ïa ka jingsngewnguh ïa ka Hundred Drums Wangala Festival Committee na ka bynta ka jingtrei shitom jong ka ha kaba pynlong ïa ka Golden Jubilee edition bad ha kaba pynkhih ïa ki nongtem, ki nongshad bad ki kynhun kiba la pynlong ïa kane ka rekod.
Ki bor pynïaid District ki ai khublei ruh ïa ka Sorkar Meghalaya bad ïa ka tnad jngohkai pyrthei, hapoh ka jingïalam jong u Myntri Rangbah ka Jylla u Conrad K Sangma, kiba la ai ka jingkyrshan kaba pura bad ai pisa na ka bynta kane ka tamasa. Ka Sorkar Jylla ka la ai pisa T.20 klur lyngba ka tnad Public Works na ka bynta ban pynbha ïa ka jaka ïalehkai Wangala A·dam bad T.6 klur na ka bynta ban pynlong ïa ka tamasa mynta u snem, na kine ka pisa ba la mynjur na ka bynta ka jingaplai, ka rukom bishar bad ka jingpynkhreh na ka bynta ka nam Guinness World Records ka long T.36500.
Shuh shuh ka bor synshar District ka ai khublei ïa ki nongtem tyngshop, ki nongshad, ki kynhun shnong, ki Nokma, ki tnad sorkar bapher bapher, ki pulit bad ki bor pahara, ki nongtrei mon sngewbha bad ki paidbah ka West Garo Hills, kiba ka jingïashim bynta bad ka jingïatreilang jong ki ka la pynlong ïa kane ka tamasa ban ïaid beit ïaid ryntih bad jop.

