Nongstoiñ, Naiwieng 15
Ha ka sngi Saitjaiñ jong ka taiew ka Mawlangdep Multipurpose Cooperative Society ha ryngkat ka jingïasnohkti lang bad ka Ge Thymmei u Muliang kila ïoh ban pynlong ïa ka tamasa ‘Choh kba’ kaba kila ai kyrteng ruh kum ka Choh Kba Festival.
Ïa katei ka tamasa la pynlong ha madan Mawlangdep-Mawliehbah kaba dei rug ka madan kaba don ha syndah ki pyntha kba jong katei ka thaiñ bad ha ka tamasa kila don ruh bun ki jingïalehkai tynrai kiba kynthup ïa ka maw poin, siat jri, siat marbul, ïa siat khnam bad kiwei kiwei.
U samla Chester Kharbani haba kren sha ki lad pathai khubor u la ong, ka jingthmu jong ka tamasa ka long ban pynneh pynsah ïa ka riti u menbarim bad u la ong ruh haba peit ïa kiwei ki tamasa ba pynlong sha kiwei ki jaka kim da don kita ki jingmut kiba jylliew hynrei ka tamasa ‘choh kba’ ka dei ba u menbarim u la ju leh naduh ki por kiba mynshwa.
U la ong ruh ba ki kwah ba lyngba kane ka tamasa kan rung noh ha ki jingthoh bad ki histori khnang ba ki riewstad bad riewshemphang kin wad bniah halor kane ka tamasa choh kba khnang ba ki jinghikai u menbarim kin nym kah bad kumjuh ruh ki longdien kin tip shaphang kata ka tamasa choh kba.
U samla Chester u la ong, kane ka tamasa lehse kan nym kut tang katne hynrei ki don ka jingthmu ban pynlong manla u snem bad ha kane ka sien ba nyngkong ka society ka khlem ïoh kino kino ki lad jingïarap pisa na ka Sorkar ne na kino kino ki tnad hynrei namar ba ki kwah ban pynneh pynsah ïa kila ïaid shakhmat da ka jingïanoh synniang ki dkhot.
Shuh shuh ha kane ka sngi la pyniphuh iphieng da ka jingïashim bynta ki khun samla ha ka jingïakop rwai tynrai, ïakop phawer ki jingshad bad kiwei kiwei.


