Khlem buh por rai ki nonghikai deficit ban bteng ka jingïakhih

Shillong, Naiwieng 15 Ka Khasi Jaintia Deficit School Teachers Association (KJDSTA) ka la shim ïa ka rai ban bteng ïa ka jingïakhih khlem buh por bad ban pynlong ïa ka jingïalang ha madan ïalehkai phutbol...

Shillong, Naiwieng 15

Ka Khasi Jaintia Deficit School Teachers Association (KJDSTA) ka la shim ïa ka rai ban bteng ïa ka jingïakhih khlem buh por bad ban pynlong ïa ka jingïalang ha madan ïalehkai phutbol kaba don hajan Saw Mer, Upper Shillong, ha ka sngi Nyngkong ha ka por 11 baje mynstep.

U President ka KJDSTA u Bah Boswell S. Pala u la ong ba ïa kane ka rai la shim wat hapdeng ka jingïakynduh jong ka seng bad u Myntri Rangbah ka Jylla u Conrad K. Sangma, ha kaba ka kynhun ka la aiti ïa ki kot ki sla kiba pynpaw ïa ki jingeh jong ka bad pan jingïarap na u.

U Bah Boswell u la ong ba u Myntri Rangbah ka Jylla u la sngap ïa ki jingeh ba la pynpaw da ka kynhun bad u la pynthikna ba un sa bishar bniah ïa ki kot ki sla shuwa ban ïakynduh biang ïa ka seng ha ka 18 tarik u Naiwieng.

Ha kane ka jingïakynduh na ka liang jong u Myntri Rangbah ka Jylla u la pynshai ba ka Sorkar kam don jingthmu ban pynduh ïa ka rukom siew pisa kaba la don lypa. Ka seng ka la pynpaw ruh ïa ka jingsngewkhia halor ka Centralized Provident Fund (CPF), ki jingpyntip jong ka tnad pule puthi sha ki nonghikai bad ka jingkynnoh ba ka la batai bakla ïa ka hukum jong ka Iingbishar ha ka shithi jong ka ha ka 11 tarik u Naiwieng.

Hynrei ka seng ka la pynpaw ïa ka jingbym sngewhun ïa ka jingpyntip kaba la wan hadien na ka ophis jong u Myntri Rangbah ka Jylla (CMO), kaba la ïoh ha ka por 8 baje eiei mynmiet jong ka sngi Palei, kaba la kyrpad ïa ki nonghikai ba kin weng noh ïa ka jingïakhih.

Ha kane ka shithi la kdew ba u Myntri Rangbah ka Jylla u la bthah ïa ka tnad pule puthi ban eksamin ïa ki mat ba ka seng ka la wanrah bad dawa, ban ai ïa ka kaiphod kaba bniah.

Haba buh jingkylli ïa katei ka rai, u Bah Boswell u la ong ba kam long kaba lah ban pdiang ban shaniah ha kajuh ka tnad kaba la tuklar ïa ki kam bad ki jingïakren jong ka da ki nonghikai ban bishar bniah ïa ki jingeh jong ki.

‘Ngim tip lano ka tnad kan ai ïa ka kaiphod jong ka. Ka lah ban shim por hynriew bnai ne wat hynriew snem ruh,” u la bynrapo.

U la pynpaw ruh ïa ka jingsngewsih halor ka jingpyntip ba thymmai jong ka tnad pule puthi, da kaba ong ba ka la pynkylla bunsien ïa ka shithi jong ka ha ka 8 tarik u Risaw, khlem da ai kano-kano ka jingpynbeit kaba shai.

Halor ka Dearness Allowance (DA) kaba dang sahteng bad ki arrears, ka tnad ka la pynpaw biang ba katei ka kam ka dang ïaid khlem da ai ïa ka por.

Ka KJDSTA ka dang bteng ban dawa ban bat ïa ka jingpynbeit jong ka CPF 2023, ban pynphai biang ïa ka Board of Trustees ba tynrai katkum ki aiñ jong ka, ban siew dep ïa ki DA bad ki arrear kiba dang sahteng.

Ka seng ka la kren shai ba ka jingïakhih khlem por jong ka kan dang bteng ha ka 16 bad 17 tarik u Naiwieng, shuwa ka jingthmu ban ïakynduh ïa u Myntri Rangbah ka Jylla ha ka 18 tarik.