Byrngem ka HBDRF ban ïakhih ha Shillong ba la shah jem & shah rem ha Block-1

Shillong, Naiwieng 15 U Bah Chandame Sungoh, Chairman ka Hynñiewtrep Border Development and Research Forum (HBDRF), u la ong ba ka don ka jingshah rem bad jingshah jem ha ki jaka khappud, kiba pynhap ha...

Shillong, Naiwieng 15

U Bah Chandame Sungoh, Chairman ka Hynñiewtrep Border Development and Research Forum (HBDRF), u la ong ba ka don ka jingshah rem bad jingshah jem ha ki jaka khappud, kiba pynhap ha ka Block-1

Haba kren sha ki lad pathai khubor u Bah Chandame Sungoh u la ong ba ka Sorkar Meghalaya kam leh eiei halor u pud u sam bad kynnoh ba ka jinghiar u Bah Sniawbhalang Dhar, MLA na Nartiang uba dei ruh u Symbud Myntri Rangbah ka Jylla sha Lapangap, ka la plie jingkhang syndon ïa ki jaitbynriew Karbi ban rep ha u Lum Pynthor, da kaba wanrah ruh ïa ki skhim Sorkar Assam ner kiwei pat.

“Kum ha Mukroh mynta, kiba na Assam ki khet ïa ki dieng bad thung da kiwei pat la kum u pud u ang ka Jylla Assam ym shuh ha Meghalaya,” u la ong.

U la pyntip ruh ba ki Karbi ki la thung ki dieng ha ki jaka khappud bad sdang pynkylla shnong ha kitei ki jaka, bad ka Sorkar Meghalaya aiu ka leh. Lada ngi hi ki nongshong ki dawa ïa la ka jong ka hok haba ïadei bad u pud u sam, 100 per cent ka shongsuk shngsaiñ te kam wan da lei lei ruh em.

Kumta u la ong ba mynta i kumba ka shongsuk shongsaiñ ka don dei namar ba ngi shah rem bad shah jem. “Ka jingshah jem bad shah rem ka long, ba ki jaka ha Khanduli, Lapangap, bad ha Mukroh, ki dangdei pura hapoh u pud jong ka Meghalaya. Te haba ka long kumne ka Sorkar kam leh eiei, dei kata keiñ kaba shah rem,” la bynrap u Bah Chandame.

Nalor kane, u la pyntip ba bun ki jaitbynriew Karbi kiba shong ba sah ha u pud u ang ka Jylla Meghalaya mynta ki la rejistar thep vote sha Assam lyngba ka Special Intensive Revision (SIR).

Haba kylli ïa ki sienjam ba ka Forum kan shim, u Bah Chandame u la ong ba shen yn phah jingthoh sha 36 ngut ki MLA na ki Konstitwensi kiba hap ha Ri Lum Khasi-Jaiñtia bad pynkhreh ruh da ka jingïakhih ha Nongbah Shillong.