Shillong, Ïaïong 14
Ka Khasi Students’ Union (KSU) ha ka Lah Sngi U Blei ka la ïakynduh ïa u MP ka Tura konstitwensi, Saleng Sangma ban kyrpad ïa ka jingtuklar ba mardor jong u halor ka mat ba ïadei bad ka thungkam thungjam hapoh NEIGRIHMS.
Ka seng hapoh ka jingïalam u President, samla Lambokstarwell Marngar bad General Secretary, samla Donald V. Thabah nalor ka jingsynran lang kiwei-kiwei ki dkhot nongïalam ka la pynsngew sha u MP halor ki kynrum-kynram ha ka rukom thungkam ha NEIGRIHMS hapoh ka jingpynïaid u Director, Dr. Nalin Mehta.
Ka seng ka la kyrpad na u MP ba un pynpeit ïa kine ki kynrum-kynram bad ba ka rukom thungkam kan ïaid katkum ki jingai jingmut jong ka seng khnang ba ki samla wad kam ka Jylla kin ïoh jingmyntoi.
Halor ka jingdawa bhah thungkam kaba 80:20 (80 kynthei, 20 shynrang) ha ka ‘Nursing’, ka seng ka la pynsngew sha u MP ba wat la u Director u la kob ba ym ju don kaba kum kata ka kyndon bhah kam, ka seng ka la ong ba ka don ki sakhi-sabut ba kiwei ki ‘hospital’ Sorkar Pdeng kum ka AIIMS bad kiwei, ki pyntreikam ïa kum katei ka rukom bhah kam.
Ka la kdew ruh ba ka Governing Council ka NEIGRIHMS ka don ka iktiar ban pyntreikam ïa katei ka kyndon ha NEIGRIHMS.
Ka seng ka la pynpaw ruh ka jingsngewkhia halor ka jingbun jong ki nos shynrang ha NEIGRIHMS kiba dang shah thungkam shen – kiba jan baroh ki dei kiba wan na Rajasthan – kaba buh jingkylli ba kumno kine ki ïoh suk ban trei ha NEIGRIHMS, kumjuh ka jingbym ïa pei ha ka ktien ka thylliej hapdeng kine ki nos shynrang na Rajasthan bad ki nongpang, ka wanrah jingeh shibun ïa ki nongshah sumar.
Haba ïadei bad ka jingpynhiar ïa ka rta thep kam na ka 35 sha ka 30 snem, ka seng ka la ong ba kane kan khanglad ïa bun ngut kiba thmu ban thep kam ha NEIGRIHMS bad kumta ka la pynsngew ha u MP ba dei ban pynneh beit ïa ka rta khanglad ha ka 35 snem.
“Halor ka jingduna ka bhah na ka bynta ki ‘riewlum trai jylla (Scheduled Tribe), ka seng ka sngew ba dei ban kyntiew shuh-shuh ïa ka bhah na ka bynta ki ‘riewlum namar ha Jylla Meghalaya, 85 na ka 100 ki dei ki ‘riewlum,” ong ka kyrwoh na ka seng.
Ha kajuh ka por, ka seng ka la ïoh ban pynsngew ruh sha u MP halor ka jingbuh ïa ki jaka ïaleh eksamin ka NEIGRIHMS shabar ka Jylla ha kaba, kiba bun ki jaka ki long kiba jngai bad kane ka pynduh lad shibun ïa ki nongïakhun eksamin khamtam kito kiba wan na ki longïing ba duna ka ïoh ka kot.
“Mynshem snem, ha ka jingïakren hapdeng ki nongïalam ka seng bad u Director, ki dkhot ka seng ki la pynsngew ba ka jingbuh ïa ki Centre sha jngai kan ktah ïa kiba bun ki nongthep kam hynrei u Director u la kynthoh kylla pynban ïa ki nongmihkhmat ka Jylla da kaba ong ba lada ha ka por ilekshon ki lah ban pynlut pisa ban pynbiang kali, por ïalap ilekshon ne ïaid ‘rally’, ki dei ruh ban pynbiang kali ïa ki nongthep kam ha NEIGRIHMS kiba ngat ban ïaleh eksamin shabar Jylla,” ong ka seng.
Na ka liang u Sangma hadien ba u la sngap ïa ki jingujor ka seng, u la kular ba un shimkhia 100 na ka 100 ban pyrshang pynurlong ïa kitei ki jingujor ka seng.
U la pyntip ruh ba u la pyrshang ban ïakynduh ïa u Dr. Nalin Mehta ha kine ki khyndiat sngi hynrei u Director u la shim shuti haduh 20 tarik u Ïaïong, 2025 (kaba dei ruh ka sngi ba khatduh ban plie ïa ka jingthep kam).
“Ka KSU ka sngew ba kane ka jingshim shuti u Director haduh katei ka sngi ka dei ka jingleh shutia jong u ban lait ban ai jubab lane ban hap pynbeit ïa ki kynrum-kynram halor ki kyndon thungkam ka NEIGRIHMS shuwa ka 20 tarik u Ïaïong,” ong ka kyrwoh na ka seng.
Haba pynsngew ba ki 2 ngut ki MP ka Jylla (Saleng Sangma bad Dr. Ricky A.J. Syngkon, Shillong) ki la rai ban pynsngew noh mardor ïa kane ka mat sha u Myntri ka koit ka khiah ka Sorkar India bad ban dawa tuklar halor ki jyrwit-jyrwat ka thungkam ha NEIGRIHMS, ka seng ka la ong ruh ba ki MP ki la pynsngew ba lada ym lah ban pynbeit ïa kitei ki kynrum-kynram, dei ban pynjlan shwa ïa ka ‘Advertisement’ ka NEIGRIHMS bad kin ym ailad ïa ki kam buit tuh utei u Director uba la phet bak na Jylla ban lait ïa pynbeit ïa kitei ki kynrum-kynram kiba ktah matïong ïa ka Jylla baroh kawei.
Halor ka jingpynshai u Director ba ka thungkam thungjam hapoh NEIGRIHMS ka ïaid katkum ka Department of Personnel & Training (DoPT) ka Sorkar Pdeng, ka seng ka la ong ba ka kwah ban pynpaw paidbah ïa ka jingthok jingshukor u Director namar ha ka por ba ka seng ka ïakynduh ïa utei u Director, ka la kdew ïa ka jingbym beit ka ‘Roster Register, ka jingbym biang ki ‘Backlog Vacancy’, hynrei u Director um shym la lah ban pynshai ïa kitei ki jingduna.
“Wat ha ka shithi ba jubab ïa ka KSU, ka NEIGRIHMS kam shym la lah ban pynshai halor kitei ki mat, ka KSU ka sngew ba lehse une u briew u thmu ban wanrah beit da ki briew lajong ban trei hapoh NEIGRIHMS,” ka la ong da kaba bynrap ba ka seng ka ïoh jingtip ruh ba u Nalin Mehta u ju pyntieng ïa ki nongtrei ba kim bit ban kren pyrshah ïa u ïoh kan ktah ïa kam jong ki.
Shuh shuh ka seng ka sngew ba ka Sorkar Jylla kam dei ban leh ‘Pontius Pilatus’ ha kane ka kam naba wat la ka NEIGRIHMS ka dei ka shlem jong ka Sorkar Pdeng, hynrei ka don pat hapoh Jylla Meghalaya bad ka Sorkar Jylla ka don hok ban tuklar ha katei ka shlem lada don kano-kano ka kynrum-kynram khamtam kaba ktah ïa ki trai jylla namar kiba bun hi kiba leit sumar ki dei kiba na Meghalaya.
