Shillong, Ïaïong 15
Ka Myntri Khynnah ka Sorkar Pdeng ba khmih ïa ka tnad Women & Child Development, ka Savitri Thakur, ha ka Sngi Ba-ar ka la pynlong ïa ka jingïalang khmih bniah bad ki heh ophisar ka tnad Social Welfare ka Sorkar Jylla.
Ki jingthmu jong ka jingïalang, ka long ban bishar bniah ïa ka jingïaid shaphrang jong ki skhim ba kongsan ka Sorkar kum ka ‘Poshan Abhiyan’, ka ‘Mission Shakti’, bad ka ‘Mission Vatsalya’.
Ha kane ka jingïa-lang, ka Myntri ka la ban jur halor ka jingdonkam ban pynkhlaiñ ïa ki rukom ai jingshakri ha ki jaka treikam, khamtam ka jingtreikam ha ki ‘Anganwadi Centre’.
Ha kajuh ka por, la ban jur haba ïadei bad ki bynta ba kongsan ba kynthup ïa ka jingdonkam jong ka jingbam kaba tei met man ka por, bad kaba bha hapoh ka Integrated Child Development Services (ICDS), kumjuh ban kyntiew ïa ki jingdon-jingem ha ki ‘Anganwadi Centre’ ban pyntikna ba ki long kiba ïadei bad ki khynnah bad ki longkmie, ban pyndonkam ïa ka teknoloji na bynta ban buddien ha ka por bad ban buddien ïa ki nongïoh jingmyntoi, ban pynshlur ïa ka jingïashim bynta jong ka imlang-sahlang, bad ban kyntiew ïa ka bor treikam jong ki nongtrei ‘Anganwadi’ ban ai ka jingshakri kaba kham bha.
Nalor kane, la pynlong ruh ïa ka jingpeit bniah bad ki bor pynïaid ka East Khasi Hills kum shi bynta jong ka jingwan jngoh ka Myntri ïa ka Thaiñ Shatei Lam Mihngi.
Ha kane ka jingïalang la don lang ruh u MLA, Bah Ollan S. Suiñ bad ki nongmihkhmat na ki tnad treikam bapher-bapher.
Ka jingïalang ka la kynthup ruh ïa ki jingpynshai ba bniah halor ka jinglong-jingman jong ki skhim pynroi bad ki projek ba ïadei bad ki jingdon-jingem ha ka distrik bad la ïakren ruh halor ka jingpyntreikam ïa ki skhim ba ïadei bad ka jingkyntiew ïa ki longkmie bad ki khynnah, ka koit ka khiah, ka pule-puthi, ka roi ka par ha ki jaka nongkyndong, bad ka jingpynmih ïa ki lad kamai kajih, nalor kiwei-kiwei.
Na ka liang ka Myntri ka la ïaroh ïa ki sienjam ka Sorkar Jylla bad ong, “Watla ki don ki jingeh ha ka jingpynïasoh bording, ki ophisar ki trei da ka jingaiti lut ban pyntikna ïa ka jingpyntreikam bha jong baroh ki skhim. Nga ai jingïaroh ïa ki sienjam jong ki bad pynshlur ïa ki ban ïai pynthymmai ïa ki jingtip halor ka ‘Poshan Tracker’, namar kine ki kaiphod ki ïarap ïa ka tnad ban pynbiang kham kloi ïa ki jingdonkam.”
Ka la bynrap, “Ngi kut jingmut ban pynurlong ïa ka thong jong u Myntri Rangbahduh, u Narendra Modi na ka bynta ka ‘Viksit Bharat’, bad man ka sienjam ba ngi shim ban pynkupbor ïa ki kynthei bad ki khynnah, ka nang pynjan ïa ngi sha kata ka thong.”
Hadien kane, ka Myntri Khynnah ka la leit ïakynduh ïa u Lat ka Jylla, u C.H. Vijayashankar ha kaba la ïakren halor ki sienjam ba la ïalam da ka Jylla ban kyntiew ïa ka bha ka miat jong ki kynthei bad ki khynnah bad ban pynbha ïa ki jingïarap ba la pynshong nongrim ha ka imlang-sahlang na ka bynta ka roi ka par kaba kynthup lang ïa baroh.
Shuh shuh kane ka jingwan jngoh ka pyni ïa ka thong jong u Myntri Rangbahduh ban pynkhlaiñ ïa ka Thaiñ Shatei Lam Mihngi lyngba ka roi ka par ba la buh jingmut, ka jingkiew shaphrang kaba kynthup lang ïa baroh, bad ban kyntiew ha ka ban pynpoi ïa ki skhim ba ïadei bad ka bha ka miat.
Kine ki jingïalang ki ban jur halor ka jingkut jingmut jong ka Sorkar Pdeng bad ki Sorkar Jylla na ka bynta ka jingsynshar kaba ïatreilang bad ka jingpynbha ïa ka jingim jong ki longkmie bad ki khynnah ha ka Jylla.
Nalor kane, kan don ruh ka jingleit jngoh ïa ki ‘Anganwadi Centre’ bad ki jaka ba pyntrei ïa ki projek ha ka sngi kaba bud ban khmih bniah ïa ka jingpyntreikam bad ka jingïatreilang ha ka imlang-sahlang.
