Shillong, Ïaïong 16
U State General Secretary ka Bharatiya Janata Party (BJP) Meghalaya State Unit, Bah Wankitbok Pohshna, u la ong ba ka Enforcement Directorate (ED) ka la ‘chargesheet’ pyrshah ïa ki nongïalam ba hakhmat jong ka Seng Congress kynthup ïa ka Sonia Gandhi bad u Rahul Gandhi haba ïadei bad ka mukotduma jong ka kotkhubor ‘National Herald’.
Ha ka jingïakren bad ki lad pathai khubor ha shlem treikam ka seng ha ka 16 tarik Ïaïong, 2025, u Bah Pohshna u la ong ba ka Congress ka kam ïalade ba ka ïeng ha kata ka nongrim jong u Mahatma Gandhi bad ka la ïalap ha kylleng ba ka ïeng na ka bynta ka hok jong ki rit paid.
“Hynrei haba peit kumno ki la leh halor ka mukotduma jong ka National Herald. Kane ka National Herald ka dei ka kotkhubor kaba la pynmih naduh ki por ba ka Ri ka dang ïaleh ïa ka jingïoh laitluid bad ïa kane ka kotkhubor la pynmih da ka kompani kaba la seng da ki nongïakhun ban pynïoh ïa ka jinglaitluid ha kito ki snem”, ong u Bah Pohshna. U la ong ba ha kitei ki snem ba la ïakhun ïa ka jinglaitluid ka Ri, ki la don kumba san hajar ngut kiba la kynshew pisa ban seng ïa kane ka kompani hynrei ha ki khyndiat por pat, ka longïing-longsem jong ka Sonia Gandhi bad u Rahul Gandhi ki la pyndonkam bakla ïa ki Aiñ bad ïa kane ka kotkhubor da kaba kynshew pisa kylla na ka pisa jong ka seng ban pyllait ïa ka ram jong ka kompani katei ka kotkhubor kaba la tip kum ka Associated Journals Ltd (AJL) kaba la kot shaduh ka T. 90 klur.
U la bynrap da kaba ong ba katkum ki kyndon ka Aiñ, ka la khang pyrshah ïa kino-kino ki seng saiñ pyrthei ban ïaleh khaïi ha kaba ka jingpynkheiñ Aiñ jong ka Congress ka long ba ka la bei tyngka sha katei ka kompani AJL ban pyllait ïa ka jingbah ram jong ka.
“Ban pyllait ïa ka AJL na kata ka jingbah ram, la thied kylla ïa ka AJL da ka kompani kaba kyrteng ka Young Indian Private Limited (YIL) ïa kaba la seng tang da ki 4-5 ngut bad 2 ngut napdeng kita ki don ïa ka bhah kaba haduh 76% bad kita ar ngut ki dei ka Sonia Gandhi bad u Rahul Gandhi”, ong u Bah Pohshna.
U Bah Pohshna u la ong ba ïa ka Congress la ïalam da ki briew kiba don dak sniew bad wat la kam pat don ka rai pynrem halor kane ka jingjia hynrei ki sakhi-sabut ki don.
“Mynta ka paw shai ba ïa ka Congress hi la ïalam ïa ka da ki briew kiba don ïa ka dak sniew bad wat la ngim pat lah rai pynrem hynrei ki sakhi ki la ïalam shata,” bynrap u Bah Pohshna.
