Mawkyrwat, Ïaïong 18
Hadien ka jingïoh jingujor na ki trai khyndew halor ka jingbym lah ka Sorkar ban thungkam pura ïa ki trai jaka katkum ka soskular (Agreement) ba la ïateh kaba ki trai jaka ki la ai sngewbha ïa ka jaka naduh u snem 2010 na ka bynta ban tei ïa ka Sub- Centre hapoh ka shnong Umjaraiñ, South West Khasi Hills District, ka Federation of Khasi Jaiñtia & Garo People (FKJGP), South West Khasi Hills District hapoh ka jingïalam u Bah Kenesjune Nonglait, President, ryngkat ki dkhot bad ki trai ha ka 17 tarik u Ïaïong ki leit ban ïakynduh ïa u Deputy Commissioner ka South West Khasi Hills District, Bah B. Mawlong ba un tuklar lem halor katei ka bynta.
U Bah Kenesjune.L.Nonglait haba ïakren bad ki lad pathai khubor u la ong ba ka seng hadien ba ka la dep ban bishar bniah ïa ki kot ki sla, ka la lap ba ka Kong Shidalin Lyngkhoi kaba dei ka trai jaka ka don hok ban dawa ïa la ka jong ka hok namar naduh u snem 2012 haduh mynta, ka dang trei tang kum ka ‘Casual’ bad kam pat ïoh ïa ka kam lajong.
Kumta ka seng ka kyrpad ïa u DC ba un shimkhia lem ïa katei ka kam bad u Bah Kenesjune Nonglait u la ong ruh ba seng kan ai por tang ar taïew bad lada jia ba ym lah ban leh eiei, ka seng kam banse ba khang tala noh shipor ïa katei ka Sub – Centre kat haduh ban da lah ban pynbeit shuwa ïa katei ka kam.
