Jowai, Ïaïong 18
U President ka VPP, Bah Ardent Miller Basaïawmoit u la ther kylla ïa u State President barim ka NPP na Meghalaya bad MP ka Rajya Sabha, u Dr. W.R. Kharlukhi halor ka jingkynnoh jong u ba ka VPP ka kyrshan ïa ki kam runar ne ‘Gunda’.
“Shisien pyrkhat, sngew ba ym dei ban pynlut por ban ïatai bad u briew uba la nang ïaid ka rta, u briew ha ka jingshisha u la dei ban pynjanai ïa ka jingim namar ngi tip ba ngin ym lah ban im sah ha kane ka pyrthei hynrei dang bunkam ban kren kulmar, ban ong ba ka VPP ka sngewtynnad ban leh ki kam ‘Gunda’,” la ong u Bah Basaïawmoit ha ka jingïalang kaba la long ha Ïawthymme, Jowai ha ka 16 tarik Ïaïong.
Ka long kaba sngewthamula bad sngewbiria haba sngap ïa ka jingkynthoh jong u MP ka Rajya Sabha, la ong u Bah Ardent bad bynrap, “Lada phai ha ki liang baroh, ka kyrdan, ka rta ngi khmih lynti ba ki jingkren kin long kiba shongnia kiba u briew ruh un sngap, un puson, un pyrkhat bad pynshong nongrim, hynrei ban shu kynnoh ba ka VPP ka kyrshan ïa ki kam runar ka long ka jingkren khunlung khynnah, ka jingkren khlem da pyrkhat bad ka jingkren kaba pyrshang ban ïalam bakla ïa u paidbah bad pynksan jubor ïalade.”
U la ong ba ka jingjia ha Narwan kaba la jia hadien ka ilekshon MDC, ka mih namar ba ka don ka jingïashet kylla bad ha ka jinglong briew lehse ka wan ka jingbitar hynrei wat la katta, ka VPP ka pynrem bad kam ju pynshlur ban leh ïa kiba kum kito ki kam.
