Shillong, Ïaïong 20 (UNI)
Hadien ka jingwan jngoh ïa ka Jylla, u ‘rang ïalehkai kriket ba pawnam ka ri, u Sachin Tendulkar u la pynbna ba ka Sachin Tendulkar Foundation (STF) ka la ïasnohktilang bad ka Gates Foundation lem bad ka Sorkar Jylla ban trei haba ïadei bad ka “lawei kaba koit ba khiah na bynta ki khynnah”.
U Tendulkar u la pynbna ïa kane lyngba ka rynsan lad pathai ‘X’: “Ka sienjam kaba sha-khmat ha ka jingïaid lynti jong ngi naba ka Sachin Tendulkar Found-ation, ka Bill Melinda Gates Foundation bad ka Sorkar Meghalaya ki la ïatehlok ban ïatreilang ha ban kyrshan ïa ka lawei kaba koit ba khiah na ka bynta ki khynnah.”
U la bynrap: “katba ngi dang pynlut por bad ki paidbah kiba shit rhem jong ka Meghalaya, la pynkynmaw ïa ngi ba ka jingkylla kaba shisha ka shim tynrai haba ka jingsngewrit bad ka jingleh eiei ki ïawan lang.”
“Ka jingkhlaiñ jong ki khynnah, ka jinglah ban shah jong ki long-ïing, bad ka jingaiti lut jong ki kynhun ka thaiñ ka ïai bteng ban ai mynsiem ïa ngi katba ngi dang sdang ïa kane ka jingïaid lynti da ka jingthmu kaba ïasam lang,” ong une u ‘rang ïalehkai kriket ba pawnam ka India.
Hapoh kane ka jingïatreilang, baroh lai kynhun kin trei ha ka liang ka koit ka khiah, ka bam ka dih kaba tei, ka pule-puthi bad ka roi ka par ha ki jaka nongkyndong ha kaba ïadei bad ki khynnah.
U Tendulkar, uba don hapdeng ka jingwan shangkai bad ka kurim, ka khun kynthei bad katto-katne ngut kiba ïajan bad u, u la pynlut katto-katne por ha Shillong, Sohra (Cherrapunjee) bad u la leit jngoh ruh ïa ka shnong Mawlynnong.
Shuh shuh u la ïakynduh bad ïakren bad ki nongshong shnong ha ki katto-katne na kine ki jaka ha ka por ka jingwan jngoh jong u.
“Ko Meghalaya, phi la rong noh ïa ngi ha ki jingkhring jong phi. Ki jingkynmaw bakhraw ki ban sah kynmaw”, u la thoh ha ka rynsan lad pathai ‘X’ hadien katei ka jingwan jngoh.
