Nongpoh, Ïaïong 20
Ki jaidbynriew Tiwah lane Lalung kiba buhai shnong ha ka Raid Lymphuid kaba hap hapoh ka Hima Khyrim ha ka Sngi Saitjaiñ ki la pynkut noh ïa ka Shad Sokra ba lai sngi lynter kaba ju pynlong shisien ha ka san snem ha shnong Lymph-uid. Ïa kane ka Shad Sokra ba mynta u snem la pynlong naduh ka 17 tarik u Ïaïong ter ter haduh mynta ka 19 tarik u Ïaïong, 2025.
Kum ban shu kdew, ka Shad Sokra ka dei ka jingrakhe ban ainguh aidem ïa u Blei uba la tip kum u Potol Maji na ka bynta ban ïoh ïa ka jingkoit jingkhiah bad ka jingkyrkhu pahuh pahai bad ruh ban wanrah ïa ka shongsuk shongsaiñ, ka jingïatylli bad jingithuh jingithaw hapdeng ki khun ki hajar jong ka Raid.
Ïa kane ka Shad Sokra kaba la pynlong ha ka jaka kyntang jong ka phyllaw ka ïingsad kaba la tip kum ka Thini Muslung Thintha Khal lane kata ka them kaba long lyhuh jong lai ngut ki kynthei, la wan ban ïadon ryngkat da u Bah Charles Marngar, MLA ka Mawhati ha ka jingdon ryngkat ki Longsan-Mansan jong ka Raid, Doloi bad ki khun ki hajar jong ka Raid Lymphuid.
U Bah Charles Marngar haba ai jingkren ha kane ka sngi, u la ai ka jingïaroh ïa ki nongïalam jong ka Raid Lymphuid kiba la lah ban pynlong ïa kane ka Shad Sokra kaba iphuh-iphieng kum shi bynta ban pynneh-pynsah ïa la ka riti ka dustur tynrai kumba la ïalam da ki longshwa-manshwa.
U la ai ruh ka kitbok-kitrwiang ïa ki nongïalam jong ka raid ba kin dang lah ban bteng ïa kane ka jingpynlong ïa kane ka Shad Sokra khnang ba kan ïai sah pateng la pateng bad pynpaw ba kum u nongmihkhmat, u dap da ka jingsngewkmen ban sakhi ïa kane ka Shad Sokra jong ka jaidbynriew Tiwah.
Ha kane ka sngi na ka liang u Bah Charles Marngar u la pynbna paidbah ruh ba ïa ka surok kaba jrong kumba 16 kilometer na Amdubighat shaduh Lymphuid, kaba la buh jingeh shikatdei ïa ki paidbah mynta da ki phew phew snem, yn sdang ban pyntrei noh shen ha kine ki khyndiat bnai ki ban wan khnang ban pynsuk ïa ki paidbah kane ka thaiñ.
Haba ïoh pat ban ïakren bad u Bah Albert Dilar, Secretary jong ka Raid Lymphuid, u la ïathuh ba kane ka Shad Sokra kaba ju pynlong shisien ha ka san snem, la pynlong ha ki lai sngi lynter, kata hapdeng jong u bnai Lber lane Ïaïong bad ha kine ki lai sngi lynter la khang pyrshah ban pynïap ne bam doh, ban pjiar snam mrad bad ruh ban phong ïa ki patlun ne juti.
U la ïathuh ruh ba ha kine ki lai sngi lynter jong ka Shad Sokra la pyndonkam da ki tiar tem ba kynthup ïa ka Khram lane ka Bom, ka Pangsi lane ka Besli, ka Thurang lane ka Besli jrong, ka jingrah ïa song syntiew ba pynïasyriem ïa ki Reng Sier, u Laidama (Lakait) ba pynïasyriem iaka Dngiem, u Mos Pari ba pynïasyriem ïa u Blang ïong, ba la ïalam lynti da u Rangbah uba paw, ha ryngkat ki riam tynrai bad shad tynrai kaba la tip kum ka Nashuni.
U la ïathuh ruh ba kino-kino kiba shad ha kane ka Shad Sokra ki hap ban shah hikai haduh 42 sngi lynter ha shwa ba kin ïoh ban hiar madan ban shad ha ka lympung bad ruh ban rah ïa ki siej kiba la dep thang ha ka ding ban bret pat kum shi bynta beh ïa ka mynsiem jakhlia bad mynsiem bymman.
