Shillong, Ïaïong 22
Ka Holy See Press Office, ha ka Sngi Ba-ar ka la pynbna ba ka ‘Mass’ on tep ïa u Pope Francis kan long ha ka Sngi Saitjaiñ, 26 tarik u Ïaïong, 2025, ha ka por 10:00 baje mynstep ha St. Peter’s Square.
U Cardinal Giovanni Battista Re, Dean jong ka College of Cardinal, un pynïaid ïa katei ka ‘Mass’, bad yn ïadonlang da ki Patriarch, ki Cardinal, ki Archbishop, ki Bishop, bad ki Lyngdoh niam na kylleng ka pyrthei.
Yn pynkut ïa ka jingrakhe Ïukharist da ka Ultima commendatio bad ka Valedictio, kaba pyni ïa ka jingsdang jong ka Novemdiales, lane ki khyndai sngi jong ka jingïam briew bad ki ‘Mass’ na bynta ka jingjahthait jong ka mynsiem u Pope Francis.
Nangta, yn rah ïa ka met jong u Pope ba la khlad noh sha St. Peter’s Basilica bad hadien nangne, sha Basilica jong ka St. Mary Major na bynta ka jingleit on tep.
Hashuwa, ha ka Sngi Balang, yn rah ïa ka synduk ba don ïa ka met u Pope, na Ïingmane jong ka Casa Santa Marta sha St. Peter’s Basilica, khnang ba ki ‘riewngeit ki lah ban leit leh burom.
U Cardinal Kevin Farrell, Camerlengo jong ka Balang Roman Bakhuid, un pynïaid ïa ka jinglehniam pynkylla ktien ha ka 23 tarik Ïaïong, ka ban sdang ha ka por 9:00 baje mynstep ha ryngkat ka jingduwai kaba lyngkot.
Kane ka jingïaid proseshon kan ïaid lyngba ka Santa Marta Square bad ka Square of the Roman Protomartyrs, ong ka khubor ka Holy See Press Office.
Nangta ka jingïaid proseshon kan mih lyngba ka Arch of the Bells sha St. Peter’s Square bad rung sha Vatican Basilica lyngba ka jingkhang pdeng.
Ha ka Duwan jong ka Jingphla Pop, u Cardinal Camerlengo un pynïaid ïa ka ‘Liturgy’, bad ha kaba pynkut jong kane, yn sa sdang pat ïa ki jingleit jngoh ïa ka met jong u Pontiff Roman.
Ka St Peter’s Basilica kan dang plie na ka bynta ki paid ‘riewngeit kiba kwah ban leh burom ïa u Pope ba la khlad noh ha ka Sngi Balang naduh ka por 11 baje mynstep haduh shiteng synñia; ha ka Sngi Palei, naduh ka por 7:00 baje mynstep haduh shiteng synñia; bad ha ka Sngi Thohdieng naduh ka por 7:00 baje mynstep haduh 7:00 baje mynmiet.
