Nongstoiñ, Ïaïong 22
Ka All Lyngngam Organization (ALO) ka la pynrem jur ïa ki jingkren tohmet ba dang shen jong u Pastor B.K Shangpliang ha ka 14 tarik u bnai Ïaïong, 2025 ha Ri Bhoi Presbyterian Synod kaba XVII ha ka shnong Umket kaba ktah ïa ka jaidbynriew Lyngngam ïa kaba la pynmih ruh ïa ki kyntien ‘Ki Lyngngam ki bam briew’.
Ha ka kyrwoh khubor ba la phah da u Bah Selestine Diengngan u la ong ruh ba kum kine ki kyntien kim long tang kiba pynbakla pura hynrei ki long kiba ma shibun, ki ïalam bakla bad pynjah burom ïa ka jaidbynriew trai ri trai muluk baroh kawei bad kaba buh jingma ïa ka jingshngaiñ, ka burom bad ka kyrdan ha ka imlang sahlang jong u hynñiewtrep hynñiewskum.
“Kum u Nongïalam Niam, ki ktien jong phi ki khia thew. Ka jingpyndonkam ïa kata ka kyrdan Pastor ban pynphriang ïa ki jingkren pynpait pynpra, pynjah burom ïa ka jaidbynriew ka long kaba khlem jingkitkhlieh bad kaba ym lah ban pdiang,” ong u Bah Selestine ha ka kyrwoh bad bynrap ruh ba ym tang ba la pynjah burom ïa ka jaidbynriew Lyngngam, hynrei phi la bet ruh ïa ki symbai jong ka jingbym ïasngewthuh jingmut ha ka imlang sahlang kiba ïaid pyrshah ïa ka jingïatylli, ka jingsuk, bad ka jingburom markylliang.
“Ngi pynmih ïa kane kum ka jingmaham kaba jur: Horkit-hordang nangne shakhamt yn ym shah ïano-ïano ba kum kitei ki jingkren kiba ktah matïong ïa ka jaidbynriew Lyngngam kin dang ïai jia,” ong ka kyrwoh na u Bah Selestine.
U Bah Selestine u la pynpaw ruh da kaba ong, “Ngi kyntu ïa phi ban pynmih ïa ka jingpanmap paidbah lyngba ki lad pathai khubor ha lane shuwa ka 28 tarik Ïaïong, 2025 bad ban shimkhia mardor ban pynbeit ïa ka jingsniew kaba mih na ki jingkren.”
Shuh shuh u la ong ruh ba lada kum kane ka jingleh ka dang bteng, kin ym artatien ban pynkiew ïa kane ka kam sha ki bor ka aiñ bad ki bor ba dei peit ïa ka hok longbriew-manbriew ban pynthikna ban ïoh ïa la ka hok.
U ong ruh ba ka jinglaitluid ban kren kam pynshlur ïano- ïano ban pynphriang ïa ki jinglamler ne ban pynjah burom ïa ka jaidbynriew ne ïa ka imlang-sahlang. Ka jingkren beiñ kam don jaka ha ka imlang-sahlang jong ki Lyngngam – khamtam eh na kito kiba kam ba ki long ki nongïalam kiba don akor ne kiba kynja mynsiem.
Ha kawei pat ka liang, halor kane ka bynta u Rev. B.K Shangpliang ha ka kyrwoh khubor ba la phah u la pynpaw da kaba ong, “Da ka jingsngewrit kum u briew ba don shibun ki jingtlot bad jingduna. Nga don ka mynsiem jingieit ïa ka ri Lyngngam bad ka jaidbynriew Lyngngam.”
U Rev. Shangpliang u la ong, “Naduh ka dohnud nga pynpaw ïa ka jingbabe ïa ka jingkren bym pyrkhat jong nga ha ka 14 tarik Ïaïong 2025 por 6:30 janmiet ha ka jingïaseng Synod Ribhoi ha ka Balang Presbyterian Umket, kaba la ktah matïong ïa ka jaidbynriew Lyngngam baroh kawei da kaba la pyndonkam ïa ka kyntien “Lyngngam bam briew”.
Shuh shuh u Rev. Shangpliang u la ong ruh, “Nga kyrpad ïa phi ba phin sngewbha ban map noh ïa ka jingkren jong nga ha katei ka por”.
