Nongstoiñ, Ïaïong 22
Ka kynhun ki nongtrei Muster Roll hapoh ka shatri jong ka All Meghalaya Muster Roll Progressive Workers Union lyngba ka kyrwoh ba la phah da u Bah Hubert Kharbani, Chairman ka kynhun, ka wer bad kyrpad ïa baroh kiba trei muster roll ba kin wan sha ka jingïalang paidbah ka ban pynlong ha ka 26 tarik u Ïaïong 2025 ha Bishop Hall Nongstoiñ, West Khasi Hills District ha ka por 12 baje nohphai sngi kaba hap ruh ha ka sngi Saitjaiñ.
Ka kyrwoh khubor na u Bah Hubert ka ong ruh ba ha katei ka sngi kaba dei ruh ka jingïalang paidbah jong ka All Meghalaya Muster Roll Progressive Workers Union ha kaba baroh ki nongtrei muster roll kin don ka jingïakynduh lang ban ïa phylliew jingmut haba ïadei bad ki mat treikam jong ka kynhun, kan don ruh ka jingpynthymmai ïa ki nongkitkam na ka bynta ka samoi treikam jong u snem 2025-2028.
Na ka liang u Bah John Kennedy Lyngkhoi kum President ka West Khasi Hills Unit u la kyrpad khamtam ïa ki muster roll na manla ki tnat treikam ka Sorkar jong ka West Khasi Hills District ba kin shimkhia ïa kane ka jingïalang da kaba wan ryntih ha katei ka sngi.
