Shillong, Ïaïong 23
U MLA ka UDP na Nongpoh, Bah Mayralborn Syiem, u la pynpaw ïa ka jingthrang ban ïohi ïa ka jingsdang biang ka jingïakren pynbeit pud hapdeng ka Meghalaya bad Assam.
“Ngi kyrmen ba ka jingïakren kan long na ka bynta ka jingmyntoi jong ki paidbah ba bun, bad ban pynthikna ba ngin don ïa ki khappud kiba shngaiñ da ka jingpynphiah kaba shai bad ba biang, khamtam da kaba buh hakhmat shwa ïa ka bit ka biang ki paidbah,” la ong u Bah Syiem haba kren ha ka sngi Balang.
Katkum ka jingïathuh u MLA uba dei ruh u dkhot ka regional committee pynbeit pud sha Ribhoi, ki don sa kumba saw jaka ba dang sah ban pynbeit ha katei ka thaiñ, ba kynthup ïa ka Borduar, Nongwah-Mawtamur, Deshdomria bad ka Block-II.
Haba kylli, u Bah Syiem u la kyntait ba ka dei ka jingshim sting jong ki ar Sorkar, ha kaba u la ong ba kum kine ki ishu ki dei kiba khia bad khluit bad ruh kaba la slem.
“Mynta da ki phew snem ka la sahteng, dei tang hadien u snem 2021-22 ba ka jingïakren ka la sdang. Ngam bakla lada nga ong ba kane ka dei ka sien ba nyngkong ba ka Sorkar MDA khlem jingsalia ka la shim ïa ka sienjam ban sdang ïakren, wat la kan don ka jingïohnong bad jingduhnong ha ka ban phiah ïa u pud u sam,” u la ong.
U Bah Syiem u la ong ba kum kine ki mat ki shim por bad suki-suki kin sa ïaid bad long kam.
