Shillong, Ïaïong 29
U Myntri ka Sorkar Jylla uba dei u MLA ka Bharatiya Janata Party (BJP) na Pynthorumkhrah, Bah Alexander Laloo Hek u la ong ban wanrah ïa rukom pyrkhat jong kano-kano ka niam hapoh kano-kano ka skulbah lane ki jaka pule ka long kaba bakla, namar ka skulbah lane ki jaka pule ki dei beit na ka bynta baroh ki samla bad baroh ki nonghikai.
Kane ka jingkren jong u Bah Hek ka long haba kylli halor ka jingjia ha skulbah North Eastern Hill University (NEHU), bad hadien ba paw ba u Asst. Professor, Alok Singh u dei u nongïalam ka Akhil Bharatiya Vidyarthi Parishad (ABVP).
Katkum ki dur kiba la saphriang ha ki rynsan social media ki pynpaw ba u Asst. Professor ha ka sobjek Hindi ba la shah shoh ha NEHU, Alok Singh u dei u nongïalam ka seng Akhil Bharatiya Vidyarthi Parishad (ABVP) kaba dei ka seng samla jong ka seng ki Hindu, ka Rashtriya Swayamsevak Sangh (RSS), bad la kynnoh ruh ba u Singh u pyrshang ban wanrah ïa ka rukom pyrkhat jong ka seng ABVP bad RSS ha NEHU.
Haba kylli, u la ong ba ym lah ban wanrah ïa ka jingthmu jong kano-kano ka seng ne niam hapoh ka jaka pule.
“Ïa kata ba ngim lah ban ïohi da ka khmat ngin ym lah ban ong eiei. Ngin ym lah ban wanrah ïa kum kita ki jingmut lane ki jingthmu jong kano-kano ka seng lane kano-kano ka niam hapoh ki jaka pule,” la ong u Bah Hek haba kren ha ka sngi Ba-ar.
Haba pynpaw ba ha Meghalaya ki don shibun ki skul niam, kynthup ïa ki skul Khristan, Hindu bad Muslim, u MLA ka BJP u la ong ba ym ju ïohi ban wanrah ïa ka niam ha ki jaka pule.
“Ka skul ka dei ban long beit ka skul, ka kolej ka dei ban long beit ka kolej bad ka skulbah ka dei ban long beit ka skulbah, ym dei ban wanrah ïa kano-kano ka niam ha ka jingpule ki samla,” u la ong.
Ha kajuh ka por u Myntri Sorkar u la pynpaw ka jingsngewsih ban ïohi ba u nonghikai u shah ktah kti ha ki samla pule namar ka ktah ïa ka jingïatip lem.
“Hooid, ka don hi ka kynrum-kynram ha NEHU, tangba ka long kaba sngewsih ba ki khynnah pule kin ktah kti ïa u nonghikai, ka ktah ïa ka jingïatip lem ka jong ngi kiba la san bad kumjuh ki samla. Ngim don hok ban ktah kti lada kam don kano-kano ka daw kaba lah ban pynsngewsih ïa ka imlang-sahlang ne ïa ka jaidbynriew. Hynrei, ban ong ban shu ktah kti khlem da don ka daw kaba biang ka long kaei-kaei kaba bakla,” la ong u Bah Hek.
