Jowai, Naitung 14
U Symbud Myntri Rangbah ka Jylla, Bah Sniawbhalang Dhar u la wan ban kyrkhu-kyrdoh ïa ki khun ki hajar jong ka Seiñraij Jowai ha ka sngi pynkut ïa ka lehniam Behdieñkhlam ha ka Lah Sngi U Blei.
Ha kane ka sngi la donlang ruh ki Myntri ka Sorkar Jylla ba kynthup ïa ka Kong Ampareen Lyngdoh bad Bah Kyrmen Shylla, ki MLA Bah Sanbor Shullai bad Bah Wailadmiki Shylla nalor u MP ka Rajya Sabha Dr. W.R Kharlukhi, ki MDC ka JHADC, ki ophisar Sorkar nalor kiwei-kiwei.
Ïa ka Behdeiñkhlam la pynkut ha pung Aitnar ha kaba da ki phew hajar ngut ki ‘riewngeit na rilum Khasi bad Jaiñtia kumjuh na kiwei ki Jylla bad nabar ri ki la wan ban sakhi ïa ka Behdeiñkhlam.
Ka jinglehniam ha ka sngi pynkut, ka la sdang da ka lehniam ‘Kynting Khnong’ ha ïingsah ka Lyngdoh bud sa ka ‘Bam Tyngkong’ bad hadien la pyndep ïa ka lehniam ‘Choh Thyndai’ kaba katkum ka jingngeit ka long ban beh ïa ki ksuid ki khrei, ka pang ka shitom bad ka sniew ka syar na ïing na sem.
Ïa ka jinglehniam la pyndep da ki shakri niam naduh u Dolloi, ki Sangot, u Chutia nalor u Pator, u Langdoh, ka Langdoh bad kiwei-kiwei ki shakri niam ka Raij.
Katba ha ka nohphai sngi la pyndep ïa ka bynta ba kongsan jong ka lehniam Behdeiñkhlam ha Aitnar kaba long ka pung ktieh kyntang. Hangne ki shakri niam hapoh ka jingïalam u pator ki la pynlong ïa ka nguh ka dem ha ka syiem aitnar bad pynbud sa ka jingwanrah ïa ka Khnong Blai ha kaba ki khun ka Niamtre ki la hiar ban shad ha pung kyntang.
Ka Seiñraij Shillong, Seng Khasi Kmie, Seiñtyllilang Niamtre Ladthadlaboh, Seiñraij Ummulong kumjuh ki Dorbar Shnong ba kynthup ka Loomiongkjam, Loomkyrwiang, Umshangiar, Panaliar, Dulong, Tpep Pale, Loompyrdi Iongpiah bad Iawmusiang ki la wanrah ïa la ki rot ha ryngkat ka khubor sha u paidbah.
Mynta ka kynti la wanrah haduh 13 tylli ki ‘rot’ ha Aitnar bad hadien ba la wanrah lut baroh ki rot la pynhiar ïa ka ‘Khnong Blai’.
Hadien ka jingshad bad pyni paidbah ïa ki rot ha pung Aitnar, ka la don sa ka lehniam ‘Datlawakor’ hapdeng ka kynhun u Langdoh na Pynthor Wah bad ka kynhun u Sangot Paswet na ka Pynthor Nein.
Ha kane ka jingïakop kaba neh 12 minit 44 sekhon ka kynhun u Langdoh ka la jop pyrshah ïa ka kynhun u Sangot Paswet bad la ngeit ba ka rep ka riang kan bha sha pynthor Wah ban sha pynthor Nein.
