Shillong, Naitung 24
Ka Khasi Hills Autonomous District Council (KHADC) ka la shim ïa ka sienjam kaba kongsan ban pynthikna halor ka jingkhuid jingsuba ha ka rukom thungkam thungjam jong ka da kaba thaw ïa ka Komiti thungkam kaba don lai ngut ki dkhot.
Ïa kane ka rai la shim da ka Executive Committee ha ka jingïalang jong ka kaba la long ha ka Sngi Palei.
Haba kren sha ki lad pathai khubor, u Executive Member, u Bah Powell Sohkhlet u la pyntip ba ïa kane ka komiti yn pynïaid da u Bah W. Khyllep uba la shongthait na ka kam IAS bad yn kynthup ruh ïa u Prof L.S Gassah na NEHU uba dei u Riewtbit halor ka Sixth Schedule bad u Dr PS Nianglang uba dei u Ophisar barim uba la tip bha ïa ki kyndon shakri katba u Joint Secretary ka KHADC un bat ïa ka kam kum u Member Secretary.
U EM u la pynpaw ba ka jingthmu ba kongsan jong ka komiti ka long ban pynthikna ïa ka jinglong khuid ha ka rukom thung kam da kaba ai jingmut halor ka jingpynïaid ïa ki eksamin bad ki interview.
“Ka komiti kan bishar bniah ruh ïa ki kyndon shakri kiba la don lypa, kiba la don la bun snem, bad kan ai jingmut ïa kiba donkam sha ka Council,” ong u EM.
Shuh shuh, u EM u la pynskhem ruh ba ka komiti thungkam kan treikam kum ka kynhun kaba laitluid, kaba lait na ka jingshah pynthut, ban pynthikna ïa ka jinglong hok bad jingshai ha ka rukom thungkam.
Haba kylli, u EM u la ong ba kane ka komiti thungkam kan peit ïa baroh ki jingpynrung kam hapoh ka Council bad kan long ka dkhot kaba neh bad ong ba yn sa pyntip shen ïa ka komiti ryngkat bad ki kyndon bad ki jingtrei jong ka, da kaba bynrap ba la khmih lynti ba kan wanrah ïa ka jingshai bad ka jingkitkhlieh ha ka rukom wad kam ha KHADC.
