Shillong, Naitung 30
Ka Sorkar Jylla dang ha kine khyndiat sngi ba la dep ka la lah ban pynkynriah ïa ki nongshong die jingdie ha shilynter ka surok ïaid kjat ha Khyndai Lad sha jaka ïeng kali ha MUDA kaba la pynshna kyrpang.
U Myntri ka Sorkar Jylla, Bah Paul Lyngdoh, u la ong hadien ba ki la lah ban pynkynriah ïa kiba shong die madan na Khyndai Lad sha MUDA, kin sa bteng ban leit kyndang sa ïa kiba shong die madan ha shilynter ka surok ha Laitumkhrah, Civil Hospital bad kiwei-kiwei de ki jaka.
Kumta na ka liang u nongthoh khubor jong U Nongsaiñ Hima ha ka Sngi Balang ka 30 tarik u Naitung 2025, u la leit ban ïakynduh kyrpang bad kiba shong die madan ha shilynter ka surok ha Laitumkhrah bad kiba shong ha Civil Hospital kaei kaba ki don ban ong, la kin kynriah ne kin pyrshah lada ka sorkar kan wan ban kyndang sa ïa ki.
Haba ïoh ban ïakren bad kiba shong die madan ha Laitumkhrah ki la ong, ba ngi pyrshah beit lada ka sorkar ka wan ban kyndang sa ïa ki na katei ka jaka, namar ngin leit shaei lait nangne kaba la ai kamai ïa ki naduh ki phew snem ba la leit. Ki la ong ruh ba kumno kin bsa ïa ka ïing ka sem lada ka sorkar kam shah shuh ïa ki ban shong die jingdie ha kitei ki jaka.
“Lada ka sorkar ka lah ban siew ïa ki kumba ki ïoh man ka sngi lyngba ka jingshong die jingdie ha surok Laitumkhrah, kata ka la bha palat, hynrei ban shu wan weng noh ka shem jingeh shibun,” ki la ong.
Shuh-shuh ki la pynpaw ka jingsngewsih ïa ka jingong u Myntri ka sorkar ba kin sa wan ban kyndang sa ïa kiba shong die madan ha Laitumkhrah, namar ki ong, nalor ba ki bsa khunrei ha ïing bad lada jia ba ka sorkar kan ym shah shuh ïa ki shaei kin leit.
Haba kylli, ki la ong lada ka sorkar ka pynkynriah ïa ki na katei ka jaka bad lada ki ai ka jaka kaba biang ba kin shong kin kohnguh ban kynriah, hynrei lada ki ai sha ki jaka bym don briew ban wan thied da lei-lei ruh kin ym kynriah na surok Laitumkhrah. Ki la kdew ruh ba kiba shong die madan ha Khyndai Lad kiba la kynriah sha MUDA ki la ud ba kim lah die man ka sngi, bad ma ki ruh ba lah biang ha kane ka jaka ban shu phah kynriah kam long kaba suk.
Nalor kane, ki la ther tyngeh ruh ïa u Myntri, Bah Paul ba u shu shong hapoh ka shuki ban shu kren katba mon kan ym ïahap. U Bah Paul u la dei ban wan peit hi da la ki jong ki khmat sha Laitumkhrah ba ka khim ne ka kylluid.
Haba kylli pat, kiba shong die jingdie ki la ong, ka lynti ka long kaba kylluid bha bad ki briew ruh ki shu wan ban ïaid lynti bad kan ym wit eiei ruh em ïa ki paidbah.
“Lada ka sorkar kan wan ban kyndang beit da ka bor ngi baroh kiba shong die madan ha Laitumkhrah ngin ïeng beit ban pyrshah,” ki la bynrap.
Haba ïoh pat ban ïakren bad kiba shong die jingdie ha khmat ka Civil Hospital, ki la ong lada ka sorkar kan wan ban phah kynriah ïa ki, shaei kin leit bylla? Namar ngi la shong la slem bha ha kane ka jaka bad ka shem jynjar haduh katta-katta.
Lada ka sorkar ka shah kin ym kwah ban kynriah na Civil, kumjuh ruh ki la bynrap da kaba ong lada ai jaka shawei-shawei ki bym lah ban die ruh ngin leit shong kumno, ka shu lut tang ka baibam, bai kali katba ka kamai pat kam ïaid.
