Shillong, Nailur 08
Ka Sorkar Jylla ka la ong ba shen kan sa shim ïa ka rai kaba skhem halor ki jingai jingmut bapher-bapher jong ka komiti ki ‘riew shemphang ne ‘Expert Committee’ halor ka bhah thung kam ne ka ‘State Reservation Policy’.
“Ka Kynhun Myntri mynta ka step ka la shimkhia halor ka kaiphod bad ki jingai jingmut bapher-bapher bad ka la rai ban pule bniah mardor ïa ka kaiphod. Ka dei ka kaiphod kaba jrong bad kaba bniah kaba kynthup haduh katto-katne hajar tylli ki sla. Ngin shim por ban pule ïa ki jingai jingmut bapher-bapher bad ngi dei ban lah ïa kane hadien ka jingkhmih bniah bad nangta ban shim ïa ka rai kaba skhem halor ki jingai jingmut bapher-bapher jong kane ka komiti,” ong u Myntri Sorkar, Bah Paul Lyngdoh sha ki nongthoh khubor hadien ka jingïalang ka Kynhun Myntri kaba la long ha ka Lah Sngi U Blei.
U la ong ba ka kaiphod ka don ïa ki jingai jingmut bapher-bapher, katto-katne na kine ki dei kiba thymmai bad kynthup ruh ïa ki jingpyrkhat halor ka ïoh ka kot.
“Mynta ngi la don ha ka kyrdan ha kaba ngi dang shu ïoh pdiang ïa ka kaiphod. Ngi la shimkhia ïa ka kaiphod bad ngin sa thaw ïa ka nongrim kum ka Kynhun Myntri halor ki jingai jingmut bapher-bapher,” la ong u Bah Lyngdoh haba pynpaw ba ki don ki mat kiba dei na ka bynta ka ‘Status Quo’ bad ki don ki pat kiba dang thymmai.
“U Chief Secretary u la batai sha ngi mynta ka sngi lyngba ka kaiphod jong u bad namarba kum ki dkhot jong ka Kynhun Myntri, ngi ruh ngi don la ki jong ki jingkylli bad ki jingsngewkhia bad ki don ki mat kiba kham donkam jingshai, namarkata, ngin sa shim katto-katne por hashuwa ba ngin wanrah ïa ka rai kaba skhem halor ka kaiphod,” u la bynrap.
U Myntri u la ong ruh ba ka Sorkar ka don ïa ka lad ban pdiang ne kyntait ïa ki jingai jingmut, bad ïa ka rai yn sa shim hadien ba la khmih bniah bin-pa-bin bad ïamir jingmut bha.
U la ban jur ba ka Sorkar kan ïaleh ban ïoh ïa ka jingmih kaba ïabiang markatjuh, da kaba buh jingmut ïa ki jingpynsngew jong baroh ki nongshim bynta.
“Ngi ju long barabor kiba pynïabiang markatjuh bad ngin ïai long kumta. Hooid, ka Sorkar ka don ka lad ban pdiang ne kyntait ïa ki jingai jingmut. Hynrei khatduh, ki jingai jingmut ki dei tang ki jingai jingmut hynrei ka rai khatduh ka dei jong ka Sorkar Jylla,” ong u Bah Lyngdoh.
Haba kylli, u Myntri u la ong, “Ka kaiphod ka la poi sha ngi ha u bnai Jylliew bad mynta ka Dorbar ka dang ïakynduh ha u bnai Nailur hynrei haba khmih ïa baroh kawei, ngin sa donkam katto-katne por namarba ka dei ka kaiphod kaba jrong ha ryngkat ki jingktah kiba ïar. Ngin ym leh bakla da kaba leh kyrkieh ha ka ban shim ïa kano-kano ka rai namar kawei-pa-kawei na ki jingai jingmut ki long kiba kongsan haduh katta-katta bad donkam ban pule bniah ïa ka.”
Ha kaba ïadei bad ka jingktah ha ka liang ka aiñ, u Bah Lyngdoh u la ong, “Ka paw shai ba ka kaiphod ka kdew ba lada phi shim ïa kane ka lynti, kin don ki jingktah ha ka liang ka aiñ, kumta ngin donkam namarkata ban pule bniah bad ban ngam jylliew haba ïadei bad kawei-pa-kawei na ki jingai jingmut.”
