Jowai, Naiwieng 06
U Symbud Myntri Rangbah ka Sorkar Jylla Bah Sniawbhalang Dhar u la aiti 50 tylli ki Laptop sha ka Kiang Nangbah Government College, Jowai ha ka jingïalang lyngkot kaba la long ha Auditorium Hall ha ka 6 tarik Naiwieng.
U Bah Sniawbhalang ha ka jingkren u la pyntip ba ïa kine ki Laptop la thied da ka tulop MLA jong u ym na kino kino ki skhim Sorkar shibynta ban kyntiew ïa ki samla ha ka liang ka pule puthi katkum ka jingïaid ka juk ka por.
U la pynpaw ruh ïa ka jingangnud jong u ban pynkylla dur ïa ka kolej hapoh u snem 2026, kynthup naduh ka jingtei thymmai ïa ka kolej, ka jingpynbha pynmiat ïa ki jaka ïalehkai kumjuh ka Auditorium Hall nalor kiwei kiwei ki jingdonkam jong ka kolej.
Ha kane ka sngi la donlang ruh u Principal Ma Hercules Toi, ki nonghikai bad ki samla pule.
