Shillong, Naiwieng 11
U Myntri ka Sorkar Jylla ba khmih ïa ka tnat Arts and Culture Bah Sanbor Shullai, uba dei u MLA ka BJP na South Shillong Konstitwensi u la kyntu jur ïa ki paidbah ban pdiang ïa ka BJP ha manla ki Konstitwensi bad ki shnong, khnang ban lah ban ïoh jingïarap khambun shah ha ka liang ka roi ka par.
Ïa kane u Bah Sanbor u la kren ha ka prokram khap ribon ïa ka shlem buh thup jingtip ne ka Library Block jong ka Lady Keane College, ha ka 11 tarik u Naiwieng 2025.
Ha kane ka sngi khap ribon ïa katei ka shlem buh thup jingtip, la ïa donlang ka Dr. A.M. Shangpliang, Principal, ka Lady Keane College, Bah W.Khyllep, President ka Governing Body, Bah AR Myrthong, Vice Principal, ki nonghikai, ki samla pule nalor kiwei-kiwei de.
La ïoh ruh ki jingrwai jingtem tynrai pynsngewbha na ki khynnah pule ka Lady Keane College.
Haba kren halor ka party, U Bah Sanbor u la ai khublei kyrpang ïa ka jingstad jong ki paidbah jong ka South Shillong Konstitwensi.
“Baroh ki paidbah ka Konstitwensi jong nga ha ka ilekshon snem 2023 ba la dep, ki la ai haduh 96% percent ka vote. Kane ka long ba baroh ki paidbah ki jied ïa nga. Kumta nga kwah ban kyrpad ïa uwei pa uwei na phi, ba sngewbha pdiang ïa ka BJP ha la ka jong ka jaka,” u la ong.
U Bah Sanbor u la kyntu ruh ba kin sngewbha ban pynshai ïa ki paidbah, ba ka por ka la dei ïa i wei pa i wei ban pdiang ïa ka kam ba bha jong u Myntri Rangbahduh jong ka ri, u Narendra Modi.
U la kyrmen ba kane ka jaka buh thup jingtip ne ka Library, lyngba ka jingdwai ha u nongbuh nongthaw, kan dang lah ban ai ka jingshakri kaba bha na ka bynta ki khynnah pule hadien habud.
Na ka liang ka Dr.Shangpliang, Principal haba kren ha kane ka sngi, ka la ai khublei ïa baroh kiba la noh synñiang sha kane ka jingtei, da kaba ong ruh ba kane ka Library Block ka long ka jingpynïar ïa ka Kolej katkum ka jingdonkam bad jingtyllun jong ka por.
