Nongpoh, Naiwieng 13
Ki Pulit ka Ri Bhoi District hapoh ka jingïalam jong u Senior Superintendent of Police, u Vivekanand Singh Rathore bad u Additional Superintendent of Police, Bah Orville Isaac Massar ha ka jingtalasi kali kaba la pynlong hynnin ka janmiet ha ka surokbah National Highway 6 ha Umling, ki la daiñ kuna ïa ka kali jong u khun u MP ka Congress na Dhubri, Assam, u Rakibul Hussain halor ka jingpyndonkam bakla ïa ki light rong blue bad rong saw, kiba ju pyndonkam da ki heh ki haiñ (VIP).
Katei ka kali Tata Safari, ka dei kaba don ïa u registration number AS02-AM-6786 bad haba khmih bniah, ka dei kaba la register ha ka kyrteng u Tanzil Hussain, uba dei u khun jong u MP ka Congress na Assam bad la ïoh ban bat ïa ka katba ka dang pynmeh ïa kitei ki light rong saw bad rong blue ban pyn-i kumba don u VIP hapoh ka kali.
Haba u SSP ka Ri Bhoi u la pyrshang ban wad bniah, u nongñiah katei ka kali, u la jubab ba katei ka kali ka dei jong u Rakibul Hussain bad la shong da saw ngut ki briew kynthup utei u nongñiah, katba u Rakibul Hussain pat um don satia hapoh ka kali. Kumta na ka liang u SSP, u la bthah mardor ban daiñ kuna bad weng mardor ïa ki light rong saw bad rongblue kiba la pyndonkam beaiñ da kitei ki bahaïing hasem da kaba shim kabu ha ka kyrteng jong u MP.
Ha kane ka jingtalasi kali kaba la pynlong ryngkat bad ka Seng Samla Shnong Umling, kiba dei ruh ha kajuh ka por kum ki Village Defense Party (VDP), la sakhi ba ki pulit lem bad ki samla shnong ki la ïoh ban bat ïa bun ngut ki nongñiah kali kiba la shoh khaw-iang nalor kiwei kiwei de ki jingpynkheiñ ïa ki kyndon aiñ ñiah kali.
Uwei uba la khamtam na kine u dei u nongñiah kali kamai uba dang thmu ban leit sha Silchar bad kit ïa bun ngut ki briew kynthup ruh ki khyllung khynnah bad longkmie, hadien ba la ïohi ba wat ban ïeng bha ruh um lah shuh. U SSP u la pynpaw ruh ïa ka jingbym lah ngeit ba kitei kiba ïadon lang, kiba kam ïalade ruh kum ki nonghikai, kumno ki nud ban phah pyllait ïa ka kali haba ki la ïohi shai ba u nongñiah u la buaid jawsheh, kaba buh jingma shikatdei ïa ki nongleit nongwan kiba don lang hapoh katei ka kali, da kaba bthah ruh ïa ki ophisar pulit ba kin daiñ kuna mardor bad ban nym shah ïa utei u nongñiah ba un leit tad haduh ba un jah shwa ka jingbuaid.
Ki longkmie bad khynnah ka shnong Umling kiba la muja ban wan peit ïa kane ka jingtalasi kali ki pulit ka Ri Bhoi ha ryngkat ka Seng Samla Shnong Umling, ki la pynpaw ïa ka jingkmen ban ïohi ïa ka jingpynjur ki pulit ïa ka jingtalasi kali, kaba long ka jingshngaiñ na ka bynta jong ki paidbah khamtam kumba katei ka surokbah, ka dei kaba ki kali ki pynher sted bha bad ki ju mih ruh bunsien ki jingjia ba sngewsih khamtam na ka jingñiah buaid bad ka jingpynher sted palat pud. Na ka liang ki heh pulit ki la shim ruh ïa kane ka kabu ban ïakren bad pynsngewthuh ïa kitei ki longkmie bad ki hep kiba rit halor ka jingkongsan ban bud ryntih ïa ki kyndon aiñ ñiah kali.
Na ka liang ki nongïalam ka Seng Samla Shnong Umling ba kynthup ïa u samla Reminold Mawrie, President bad u samla Banteiborlang Kshiar, Vice President, ki la pynpaw ïa ka jingsngewkmen ban don ïa ka jingïatreilang ryngkat bad ki bor pulit ban pynlong ïa katei ka jingtalasi kali na ka bynta ban wanrah ïa ka jingshngaiñ ïa ki paidbah nongleit nongwan.
Kitei ki nongïalam ki la pynpaw ruh ïa ka jingsngewtynnad haba ki ïohi ba ki bor pulit kim shym la leh shilliang ha ka jingtalasi kali, la ki dei kiba rit baria, ne ki heh ki haiñ ruh kumjuh, hynrei ka aiñ ka treikam hi kumjuh bad pynpaw ruh ba kum kine ki jingïatreilang ki wanrah ruh ïa ka jingïajan bad pynsuk ruh ïa ki kum ki ‘riew paidbah ban don ïa ka jingïajan bad ka jingïatreilang ryngkat-ryngkat ban wanrah ïa ka leit ka wan bad ka imlang ka sahlang kaba suk kaba shngaiñ.
Shuh shuh ki la kyntu ruh ïa ki nongñiah kali, ba ki dei ban kiar na ka ñiah kali buaid, naba kane ka jingleh ka jong ki, ka buh jingma ym tang ïa ki shimet, hynrei ïa kiba bun kiwei pat ki nongleit nongwan ha ka surokbah.
Lyngba kane ka jingtalasi, ki pulit ka Ri Bhoi ki la ïoh ban daiñ kuna palat ïa ka T.6 lak na ki nongñiah kali kiba pynkheiñ aiñ, kata tang ha ki kynta naduh ka por 6 baje janmiet tad haduh ka por 11 baje mynmiet bad kumba la ïohi, ki jingjia tyngkhuh kali bad kiwei-kiwei de ki jingjia ba sngewsih naduh ba la sdang pynlong ïa kiba kum kine ki jingtalasi kali na ka por sha ka por ha kine ki khyndiat bnai, kila sdang ban hiar arsut, lait noh tang kiba malu mala hangne hangtai.
