Shillong, Naiwieng 13
Ka jingïalang ba la khot pynlong da ki arngut ki Symbud Myntri Rangbah ka Jylla u Bah Prestone Tynsong bad u Bah Sniawbhalang Dhar ka la shim ïa ka rai ban buh ïa ka dor kit ba T.9 shi ton ha ka shi kilomitar na ka bynta ka jingkit dewbilat bad ‘Clinker’ hapoh ka Jylla Megha-laya.
Ïa kane ka rai ki nongïalam ka Jaintia Hills Cement Manufac-turers Association (JHC-MA) bad ki seng nongñiah trok ba kynthup ka Meghalaya Commercial Truck Owners & Drivers Association (MCTODA), Jaiñtia Hills Truck Owners & Drivers Asso-ciation (JHTODA) bad ka East Jaintia Hills Truck Owners & Transporter Association (EJHTOTA) ki la pdiang ïa kane ka rai ka Sorkar.
Ïa kane ka jingïalang la khot hadien ba ka MCTODA ka la pynjur ïa ka jingïakhih jong ka ha Mawryngkneng.
Haba kren sha ki nongthoh khubor u Symbud Myntri Rang-bah u Bah Sniawbhalang Dhar u la ong ba ka jingïalang ka long kaba bit ba biang ha kaba la pynbeit ïa ki katto katne ki mat, katba ïa kiwei pat ki mat jingdawa la pynjlan ban ïakren ha ka 21 tarik u Naiwieng 2025 bad ka Sorkar Jylla ka la pdiang ïa ka jingdawa jong ka MCTODA.
Shuh-shuh u la ong ba ka dor ba la buh thymmai kaba long T.9, ka bujli ïa ka dor kaba ju kylla T.7 sha ka T.11 shi ton ha ka shi kilomitar bad kane ka dor T.9 ka treikam tang hapoh ka Jylla, ki nongkit mar bad ki trai trok kiba don ha ka jingïalang ki la pdiang.
U Bah Sniawbhalang u la pyntip ba ka Sorkar Jylla ka la pynbor ruh ïa ki kompeni ban ai bhah haduh 120 tylli ki trok na ka bynta ki kali ba napoh ka Jylla, ïa kaba ha ki por ba ladep ka dei tang 80 tylli ki trok ha ka shisngi.
Shuh-shuh haba ïakren bad u President ka MCTODA u Bah Moslander Marngar u la ong ba ka Association ka la pynpaw kumno ki karkhana pynmih dewbilat ki pynkylla ïa ka dor kit da kaba tyrwa ïa ka jingsiew kaba kyllaiñ kaba long T.7 haduh T.11 shi ton ha ka kilomitar na ka bynta ka dewbilat bad Clinker.
U Bah Moslander ula pynpaw ba u pdiang sngewbha ïa ka jingmih na ka jingïalang ba la khot da ki Symbud Myntri Rangbah u Bah Prestone Tynsong bad u Bah Sniawbhalang Dhar, da kaba u la kdew ba ki arngut ki nongïalam ki la rai ban pynbeit ïa ka dor kit ha ka dor T.9 shi ton ha ka shi kilomitar” hapoh ka Jylla.
Nalor kata u la pynpaw ïa ka jingbym ïahap kaba jur bha ha ka jingwanrah ïa ki trok ki kompeni.”Ki trok ba pyndonkam da ki karkhana pynmih dewbilat na shabar ka Jylla ki don haduh 1,000 haduh 2,000 tylli ha ka shisngi, katba tang 80 tylli ki trok ba napoh ka Jylla.”
U la pynpaw ïa ka jingbym pdiang ïa kane bad u la ban biang ïa ka jingdawa ba dei ban ai shwa ïa ki trok ba napoh ka Jylla namar ba ïa ki karkhana la buh hapoh Meghalaya.
