Shillong, Naiwieng 16
Kawei ka longkmie, ba la tip kyrteng ka Kong Thri Phawa, ba la 44 snem ka rta, kaba la shah pom da ka wait ha la u jong u kurim ka la sdang khlaiñ bad ïoh bor mynta.
U ne u kurim jong ka Kong Thri u dei uba la tip kyrteng u Bah Bike Chyrmang.
Kane ka jingjia pom u kurim, da ka wait ïa la ka jong ka kurim ka dei ha ka 27 tarik u Risaw 2025, ha ka shnong Marjai, West Jaiñtia Hills District bad mynta ka la dap ar taiew tam ei-ei.
U Bah Bike Chyrmang, u la pom da ka wait ïa ka Kong Thri Phawa, kaba dei ka kurim jong u na ka khlieh, u ryndang bad na baroh ar tylli ki kti, ha kaba ka la mynsaw jur.
Haba buddien halor kane ka jingjia, na ka liang u nongthoh khubor jong u Nongsaiñ Hima ha ka 16 tarik u Naiwieng 2025, u la ïoh ban ïakren bad ka khun khatduh jong katei ka longkmie, ha kaba ka la ïathuh ba mynta ka Kmie jong ki, ka la kham khlaiñ bad ïoh bor.
Ka la ïathuh “Mynta la don kumba shi taiew ei-ei, ka Kmie ka la thiah ha ïing ban sumar, da ka jingbthah ki dokor, khnang ban ïoh jahthaid. Bad ki doktor ki la bthah ruh ba kin sa wan biang sha jaka sumar hadien.
Haba kylli, kane ka khun khatduh jong ka Kong Thri Phawa ka la ong ba kim tip ba na kaei ka daw ba u Kpa u la pom da ka wait ïa ka Kmie, namar ha ka por 3 baje ei-ei ha ka 27 tarik, ki la wanphai na jaka trei bad ki la lap pynban ïa ka snam ba la lyngkien ha madan.
Lah ban kdew hange, ba ïa ka Kong Thri Phawa mar shu jia katei ka jingjia, la pynkit sha Mission Hospital Jowai hynrei namar ka jingbym biang katei ka jaka sumar, la pynkit noh sha Nazareth Hospital, Shillong.
