Shillong, Naiwieng 18
Ka Hynñiewtrep Youth Council (HYC) ka kwah ban wanrah sha ka jingtip jong ka Sorkar ha kaba ïadei bad ki jingkulmar bad ki jingsawa kiba palat pud kiba mih ha ka por ba dang shu kut ka tamasa Cherry Blossom 2025, kaba la pynlong ha JN Stadium Polo, kaba la pynthut ïa ki sah hajan.
Ha ka kyrwoh ba la phah da u President ka HYC u Bah Roykupar Synrem, u la ong ba ha kine ki khyndiat sngi ba la dep, katto-katne ngut ki nongshong shnong ki la pynpaw ïa ka jingeh kaba jur, namar ka jingsawa kaba jam, ha ka por miet, ka jingkhapngiah kali, bad kaba la long khlem akor haba ïadei bad ka tamasa.
U la ong ba kum kine ki jingpynthut ki la ktah ïa ki rukom im ba man ka sngi, ki por shongthait, bad ka jinglong jingman baroh kawei jong ki longïing, ki samla pule, ki nongshong shnong kiba la tymmen, bad ki nongtrei kiba sah hajan ka JN Stadium ha Polo.
“Kumba la kam da ka Sorkar Jylla, lehse kine ki jingpynlong ïa kum kine ki jingleh kmen ki ïarap ha ka ïoh ka kot jong ka Jylla. Hynrei kim dei ban pynlong ha ki jaka ba bun briew kaba la pynthut ruh ha ka imlang ka sahlang,” la ong u Bah Roykupar.
U la ong ruh ba ka jingpynbyrngia jong u wei, kam dei ban pynduh ïa ka hok jong kiwei pat ki nongshong shnong ban im ha ka jaka kaba shngaiñ bad kaba suk.
Ka HYC ka pyrshah jur ïa kino-kino ki jingïalang kiba kum kane ka jingleh ban pynlong ha ki jaka sah briew bad khamtam eh hapoh ka Nongbah Shillong ha ki por ban wan. Katba lah kum kine ki jingïalang dei ban pynlong ha ki jaka bym shong briew bad ha ki jaka ba marjan jong ka Sor Shillong, la ong u Bah Roykupar.
