Thom da ka bor ki Karbi haba kyntur pud sha Meghalaya, ong u Ma Thombor

Jowai, Naiwieng 20

Ki Karbi ki thom da ka bor haba kyntur pud sha ki jaka khappud jong ka jylla Meghalaya khnang ban ïar u pud u sam jong ki ban ïoh byllai ki skim pynroi, kynnoh u Chief Executive Member (CEM) jong ka JHADC u Ma Thombor Shiwat.

U Ma Thombor u la pynpaw ïa katei ka jingkynnoh haba jubab ïa ka motion ba la wanrah da u MDC jong ka Jowai North u Ma Awhai Andrew Shullai ha ka Dorbar Tlang ha ka 20 tarik Naiwieng.

U CEM ka JHADC u la ïathuh ba “Ka jingpyrshang jong ngi ban ïakynduh ïa u Chief Executive Member jong ka Karbi Anglong Autonomous Council (KAAC) kam poi shano shano namar ba kim treh ban ïakynduh bad ngi.”

U la ïathuh ruh ba ki la ïakynduh ïa u CEM ka KAAC lem bad ki dkhot jong u ha ka jingpynbeit jong u MLA ka Mawhati Konstitwensi u Bah Charles Marngar hynrei hangta ruh kim treh ban ïakren halor ki kam khappud.

Halor ka jingai jingmut jong u Ma Andrew ban leit jurip da ka Executive Committee, u Ma Thombor u la ong ba ka jingleit jurip da ka Executive Committee sha Lapangap lehse kan long kumba yn ai ding ïa ki Karbi bad lehse kan sa wanrah biang ïa ka jingbym shong shngaiñ.

Haba ïadei ba ka jingdawa na u MDC ka Jowai North ban pynlong biang ïa ka jingkhmih biang ne survey biang ïa ki jaka puta katkum ki patta ha Lapangap, u CEM u la ong ba ïa kane kam, dei ban ïa pyrkhat sani lang.

Ha kawei pat ka liang, u MDC jong ka Amwi Khliehtyrshi u Ma Madonbai Rymbai u la wanrah ïa ka motion ban ïatai halor ka jingtreikam jong ka Sixth Schedule bad haba ïatai ïa kane ka motion u la ban jur halor ban khmih biang ïa ka jinglait tuh jong ka khajna jong ka JHADC.

U la ai jingmut ba dei ban khmih na ka por sha ka por halor ka jingai tulop jong ka Sorkar Jylla sha ka JHADC.

U Chief Executive Member jong ka JHADC u la kyntait ban ai jubab ïa katei ka motion namar kam long kaba shai.