Delhi, Nohprah 21
Ka President jong ka ri India ka la ai jingmynjur ïa ka Viksit Bharat-Guarantee for Rozgar and Ajeevika Mission (Gramin) (VB-G RAM G) Bill, 2025 kaba pyni ïa u mawmer ba kongsan ha ka jingpynkylla ïa ka polisi ai kam ha ki jaka nongkyndong. Ka aiñ ka kyntiew ïa ka jingpynthikna ban ïoh kam ba siew bai bylla katkum ka aiñ haduh 125 sngi ha man ka snem mang tyngka na ka bynta ki longïing ha ki jaka nongkyndong bad ka ïaleh ban kyntiew ïa ka jingpynkupbor, ka jingkiew shaphrang kaba ïoh bynta lang, ka jingïasohlang jong ki sienjam na ka bynta ka roi ka par bad ka jingpynpoi kam kaba pynshong nongrim ha ka jingdap lut, da kaba pynkhlaiñ ïa ka nongrim na ka bynta ki jaka nongkyndong jong ka Bharat kiba la riewspah, kiba skhem bad kaba lah ban kyrshan dalade.
Hashuwa kane, ka Parliament ka la mynjur ïa ka Viksit Bharat – Guarantee for Rozgar and Ajeevika Mission (Gramin) Bill, 2025, kaba pyni ïa ka jingpynkylla kaba radbah ha ka rukom ai kam ai jam bad ka roi ka par ha ki jaka nongkyndong jong ka India. Ka aiñ ka bujli ïa ka Mahatma Gandhi National Rural Employment Guarantee Act (MGNREGA), 2005, da ka aiñ kaba katkum ka juk mynta kaba kyntiew ïa ka jingshngaiñ ha ka kamai kajih bad kaba ïahap bad ka jingthmu jong ka ri na ka bynta Viksit Bharat @2047.
Ha kaba la buh nongrim ha ka jingpynkupbor, ka jingkiew shaphrang, ka jingïasohlang bad ka jingpynpoi lut ki kam, ka aiñ ka ïaleh ban pynkylla ïa ka lad ïoh kam ha ki jaka nongkyndong na ka jingïarap ïa ka bha ka miat kaba ïeng marwei sha ka atiar ba ïatylli jong ka roi ka par. Ka pynkhlaiñ ïa ka jingshngaiñ ha ka ïoh ka kot na ka bynta ki longïng ha ki jaka nongkyndong, ka pynthymmai ïa ka jingsynshar bad ka jingkitkhlieh, bad ka pynïadei ïa ka lad ban ïoh kam ba siew bai bylla bad ka jingpynbiang ïa ki jingdon jingem ha ki jaka nongkyndong kiba neh bad kiba seisoh, da kaba buh ïa ka nongrim na ka bynta ki jaka nongkyndong jong ka Bharat kiba seisoh bad kiba lah ban kyrshan dalade.
Ka Viksit Bharat – Guarantee for Rozgar and Ajeevika Mission (Gramin) Act, 2025 ka pyni ïa ka sienjam kaba radbah ban pynthymmai bad pynkhlaiñ ïa ka rukom ai kam ha ki jaka nongkyndong jong ka India katkum ka jingthmu jong ka Viksit Bharat @2047. Da kaba kyntiew ïa ka jingpynthikna ban ïoh kam ba siew bai bylla katkum ka aiñ haduh 125 sngi ha man ka snem mang tyngka, ka ain ka pynskhem ïa ka hok ban dawa kam katba ka pynskhem ïa ka jingsynshar kaba don bynta lang. Ka pynïasoh lang ïa ka jingbei tyngka kaba shai, kaba pynshong nongrim ha ki kyndon, ki rukom ai jingkitkhlieh, ka jingïoh bynta lang kaba wan na ka teknoloji bad ka roi ka par kaba la wanrah da ka jingïatylli ban pynthikna ba ka jingïoh kam ha ki jaka nongkyndong kam ai tang ïa ka jingshngaiñ ha ka ïoh ka kot hynrei ka noh synñiang ruh sha ka kamai kajih kaba neh, ki jingdon jngem kiba skhem bad ka roi ka par kaba jrong samoi ha ki jaka nongkyndong.
