Shillong, Risaw 29
Ka Voice of the People Party (VPP) lyngba u Bah Ardent Miller Basaiawmoit, President, ka la phah ïa ka khubor sngewlem halor ka jingkhlad noh ba kyndit jong u Rev.Fr. John Madur.
Ha ka kyrwoh ba la phah u Bah Ardent u la ong “Ka jingkhlad noh jong u Rev.Fr.John Madur ka long ka jingduh ym tang ïa ka Balang bad ki Khristan hynrei ïa baroh kiba ithuh bad kiba don jingïadei bad u.
U Bah Ardent u la pynpaw ruh ba u la ïakynduh nyngkong bad u Rev. Fr. John Madur ha ka 31 u Nohprah 1999, ha ka por ba u dang long kum u President ka Federation of Khasi Jaiñtia and Garo People (FKJGP). Ngi la ïakynduh ha ka por ba ka seng ka la pynlong ïa ka prokram ha YMCA, Mawkhar.
“Ka jingduh noh ïa u Rev.Fr.John Madur ka long ka jingduh kaba khraw,” u la bynrap.
Namarkata, u la phah ka kyrwoh sngewlem sha ki bahaïing hasem, ka Balang bad sha baroh kiba don hapdeng ka jingsngewsih halor ka jingkhlad noh jong u, bad ban duwai ba ka mynsiem jong u, kan shong jah thait junom.
