Shillong, Risaw 29
Hadien ba ka Sorkar Jylla ka la ujor da ka FIR pyrshah ïa u Inspector ka Enforcement Wing ka tnad Trade jong ka Khasi Hills Autonomous Dis-trict Council (KHADC), u Chief Executive Member (CEM) u Bah Winston Tony Lyngdoh, u la ong ba ka jingleh ka Sorkar ka dei tang ban pyntieng ïa ka Council.
Lah ban kdew ba ka jingujor FIR ka Sorkar, ka dei halor ka jingleit khang ka Council ïa ka projek Ropeway ha Laban, halor ka nongrim, ba katei ka kompeni kaba pyntrei ïa katei ka projek, kam shym la shimkhia ban shim lisen na ka Council.
Haba kren sha ki lad pathai khubor u Bah Winston u la ong “Ka Council kam pat ïoh ïa ka kopi jong katei ka FIR ba ujor ka Sorkar”.
“Ka District Council ka la ïaid katkum ki kyndon ha ka Trading by Non-Tribal Regulation 1954. Naduh u bnai Jymmang 2026, ka Council ka la ïoh ïa ka application na ka kompani bad ha katei ka por ym pat da biang ki kot ki sla, hadien pat ka kompeni kam shym la pat pynbiang bad ka Council ka la phah da ka Show Cause Notice, hynrei ka dang ïoh tang ka NOC na ka Riat Laban Dorbar Pyllun,” la ong u CEM.
U la ong ruh ba hadien ba ka Council ka la ïoh jingtip ba ka kam ka la ïaid shaid-shaid, ki la leit sha katei ka jaka katkum ki kyndon, ym ban leit thombor kumba la kynnoh.
U la ong ba ka Council ka la phah ïa ki ophisar jong ka tnad aiñ (Law) ban wad ïa ka kopi, namar haduh mynta kim pat tip ïa ka jingkynthoh bad ka nongrim jong ka FIR. Katkum ka jingtip ba ki ïoh, ka FIR ka lah ban ïadei bad ka jingleit jong ka tnad Enforcement ban khang ïa ka kam namar ka jingbym biang jong ka trading licence.
Haba jubab ïa ki jingkynnoh ba ka KHADC ka la pyndonkam da ka bor, u la ong ba “Ka Council kam shym la leit thombor, hynrei ka la leh katkum ka lynti kaba dei, da kaba pan ïa ki kot ki sla bad ki jingtip kiba don ha ki record”.
U la buh jingkylli ruh halor ka kontrak jong kane ka projek, kaba la pynpaw ba ka jingpyntreikam ïa ka kontrak ka la sdang naduh ka 27 tarik u Nailar 2024, bad ka jinglut ka long T.1 klur 51 lak. Ka KHADC ka kwah ban tip kumno ka Sorkar ka pynshong nongrim ïa kane ka kam, haba katkum ka jingong jong u, ki jingbatai kiba bniah halor ka kam, kim shym la paw ha ka work tender.
Na ka liang u Bah Powell Sohkhlet, EM ba khmih ïa ka tnad Land, u la ong ki ophisar jong ka Council ki trei katkum ka bor ba la ai da ka Executive Committee, da kaba ban jur ba ka Council kam shym leit sha katei ka jaka kum ki riew shimet ne ki kynhun sengbhalang, hynrei ka leit katkum ki aiñ.
