Shillong, Risaw 29
U MLA ka BJP na Nongpoh Bah Mayralborn Syiem ha ka sngi Palei u la bthah ïa u Bah Vincent H Pala uba dei u President ka Meghalaya Pradesh Congress Com-mittee (MPCC) ban pynbeit shuwa ïa la ka jong ka ïing ka sem hadien ba u la kynthoh ïa ki MLA barim ka UDP ba kynthih sha ka BJP ba kin sa mad ïa kajuh ka nusib kumba mad ki MLA ba kynthih sha ka TMC.
Haba pynpaw ïa ka jingsngew skhem ban jop biang kum u MLA ka Nongpoh, u Bah Mayralborn u la ong, man ki ilekshon ki long kiba eh bad dei ki nongthep vote kiba rai halor ki kam bala leh.
“Man ki ilekshon ki long kiba eh. Ha u 2018 haba nga jop na ka Congress ka long kaba eh bha, ha u 2023 na ka UDP ruh ka long kaba eh bha. Ki paidbah ki ai ïa ka rai halor ka jingshakri bad ka kam bala leh na ka bynta ka konstitwensi,” ong u Bah Mayralborn bad bynrap “Ki paidbah kin jied na ka bynta ki briew kiba trei na ka bynta ka jingmyntoi jong ka konstitwensi.”
“Da kaba burom ïa u President ka MPCC, u dei ban peit shwa ïa la ka jong ka kynhun bad pyrshang ban lum ïa la ka jong ka kynhun hashuwa ban kdew kti ïa kiwei. Ngam don eiei pyrshah ïa ka Congress. Nga burom ïa baroh ki seng saiñpyrthei,” ong u Bah Mayralborn.
Shuh shuh u la bynrap, “Nga dei tang u shipai uba rit ha ka duriaw kaba heh jong ka jylli saiñpyrthei. Ngin shakri naduh ka mynsiem bad kyrmen ba ki paidbah kin kyrshan ïa ngi ynda la dei ka por”.
