Shillong, Risaw 29
Ki ophisar na ki saw tylli ki tnad kata na ka ophis Deputy Commissioner East Khasi Hills District, ka tnad Pollution, tnad PWD bad Municipal ki la leit ban jurip ban peit bniah ban wad ïa ka daw ha kaba ïadei bad ka jingmih ka jingsma kaba shyrkhei ha Rilbong bad Jhalupara kaba tuid sha Umshyrpi.
Ka jingwan jurip ïa kane ka jaka ka dei hadien ka khubor kaba la pynmih ha U Nongsaiñ Hima ha kaba la ïoh ïa ka jingujor na ki paidbah ba ïaid lynti ba ka mih ka jingsma kaba shyrkhei na ka tei ka nala ha Rilbong.
Na ka liang u Bah Disparsing Rani uba dei u nongwad jingtip lyngba ka Right To Information (RTI) hadien ba u la ïohi ïa ka khubor ha U Nongsaiñ Hima u la phah ka jingthoh bad ban pan da ka RTI napoh DC ophis ban wad ïa ka daw naei ka mih ka jingsma ha katei ka jaka.
Hadien ba ki ophisar na ki saw tylli ki tnad Sorkar ha ryngkat u Bah Disparsing Rani ki la jurip ïa katei ka jaka ki la lap shisha ïa ka jingsma bad ka daw tynrai ba mih ka jingsma ka dei na Cantonment namar katkum ka jingtuid ka um ka dei beit ka um paiñkhana kaba la pyntuit beit sha ka nala.
Na ka liang ki ophisar ka tnad Pollution ki la tong ïa ka um ba mih na ka nala ban peitbniah ha kaba ïadei bad ka nala kaba mih ka jingsma ha surok Rilbong. Kumjuh na ka liang ki ophisar ka tnad PWD ki la shim ka rai ban phah ka jingthoh sha ka National Highway 44 ban tap noh ïa ka thliew nala ban wanrah ïa ka jingshngaiñ ki nongleit nongwan bad ban pyllait na ka jingsma.
Haba ïakren bad u Bah Disparsing Rani u la ïathuh ba hadien ba u la pan jingtip lyngba ka RTI u la ïoh ban wan jurip ïa ka jingsma ha Rilbong bad ki ophisar Sorkar na ki tnad bapher-bapher.
U la ïathuh hadien ba la jurip la lap ba ka jingsma ka mih ba tuid ki jaboh ba wan na ki paiñkhana na Cantonment kaba la leit beit sha Umshyrpi.
U la pyntip ba ki ophisar ka tnad Pollution ki la tong ïa ka um ban peit bniah hadien kata kin sa ai ïa ka kaiphod ha ophis DC bad sha u ruh.
Shuh shuh u la ïathuh ba ka tnad PWD ka la shim ïa ka rai ban thoh sha ka National Highway ban tap ïa ka thliew ban nym sma bad ban shngaiñ ïa kiba leit ba wan ruh.
Na ka liang u Bah Disparsing u la kular ban buddien ïa kane ka jingsma namar ka Rilbong ka dei ka jaka kaba ki nongjngohkai pyrthei ki ju wan na Guwahati ban leit sha Sohra.
