Dei ba ai mynsiem u Conrad Sangma sa ïaid beit ka ‘Public Hearing’ ha Daistong: Donbok

Shillong, Nohprah 21

U Bah Donbok Dkhar, President ka Hynñiewtrep Integrated Territorial Orgainization (HITO) u la kynnoh ba dei u Myntri Rangbah ka Jylla, u Conrad K Sangma uba la ai mynsiem ban pynïaid beit shakhmat ïa ka jingïalang paidbah ne ka Public Hearing ha ka shnong Daistong myn ha ka 19 tarik u Nohprah 2025.

U la ong ba ka HITO ka la phah jingthoh sha ka ophis ka Meghalaya State Pollution Control Board (MSPCB) ban pynsangeh halor kane ka jingthmu pynlong ïa kane ka jingïalang paidbah hynrei  ym lah shuh namar bal ah dep ban rai ïa kane ka jingïalang paidbah ne ka Public Hearing yn ïaid beit shakhmat.

Haba ïakren bad u Nongsaiñ Hima, u Bah Donbok u la ïathuh ba ha ka por ba ka HITO ka la leit sha katei ka jingïalang ban pynpaw ïa ka jingpyrshah hynrei kim shym la ïoh shuh namar ba la don ki gang kiba la ker ha surok ban pakhang lynti.

“Ki ba pakhang lynti ha katei ka sngi, ki dei hi ki briew jong katei ka shnong bad ki dei kiba la sha thied ha ka Sorkar, da kaba ïaroh ba ki trei hok ïa ka kam ba ki la sha thied ha ka Sorkar,” la ong u Bah Donbok.

U la ong ruh ba ha man la ki hukum jong ki Deputy Commissioner (DC) ba ym bit ban kah dur khmat  bad ym bit ban rah lathi, hynrei kine ki briew pat ki rah, da kaba bynrap ba ha katei ka sngi ruh ki la pakhang syndon da ka Dumper hapdeng surok bad ïa ki DC bad ki heh Sorkar ki la phah hiar noh bad shim kali pateng pat ban leit sha ka jingïalang.

U Bah Donbok u ong ba lada wan bing kan eka karkhana shna Cement ha ka tei ka thaiñ kan sa ktah shisha ïa ka jinglong jingman ha ka mei mariang bad ki briew kiba la don ha katei ka  jingïalang ruh la dep thied da ki heh spah.

U ong “Kaba sngewsih ka long ba ka Sorkar ka pynbiej ïa kito ki briew bad mynta kam dei shuh ka aiñ hynrei ka lah dei ka eit”.

U la kynthoh ruh ïa baroh ki Political Party kiba ju kren ban don ryngkat bad ki paidbah ban ïada ïa ka khyndew ka shyiap hynrei ha kane ka kynti ba mynta pat ka jingïam jong ki paidbah bad ka jingsngewsih, ym shym la don kiba wan ai ka jingkyrshan.

Nalor kata, u Bah Donbok u la ong ba halor kane ka kam ka HITO kan sa nangïai buddien watla ka jingïalang ka la ïaid beit shakhmat ruh.