Shillong, Nohprah 22
Ka Hynñiewtrep National Liberation Council (HNLC) ka kynhun kiengatiar bala kheiñ be-ain kala kynthoh ïa u President ka Voice of the People Party (VPP) Bah Ardent Miller Basaiawmoit, ba um dei ban saitkhuid ïa ka kam thung Syiem ka Hima Sohra bad ba um dei ban leh kum u “Blei Khyndew”.
Ha ka kyrwoh na u General Secretary ka HNLC Bah Sainkupar Nongtraw ba la phah sha ki lad pathai khubor, u la ong, “Ngi ka HNLC ngi tip shai ba u Mynjurlang Majaw uba la shah thung kum u Acting Syiem (Hima Sohra) u dei u briew jong ki na ka party Prah”.
“Ka HNLC kam kynriah tang shi ksai na ka nongrim ba ka ïeng halor ka jingbym ai sanad ka KHADC ïa u Syiem Sohra namar ngi tip shai ba u Mynjurlang Majaw u Acting Chief ba ka thung, u dei u briew jong ki na ka party Prah, kumta u Ardent um dei ban saitkhuid bad um dei ban leh kum u Blei khyndew,” ong ka kyrwoh.
Katkum ka jingong u Bah Sainkupar, “Ngi don ka hok ban tuklar bad ka hok jong ka jaidbynriew kaba phi hap ban siew ka long kumba phi bet kumta ruh phin sa ot”.
“U David ba shisha um ju put turoi ïalade ha camera shuwa ban leit sha thma. Lada ka por ka la khot wat u David thok (false David) ruh u hap long langkñia,” u la bynrap.
Ka HNLC kala pynkut da kaba ong “Ka kot ba ka HNLC kan sa pynmih shen kaba kyrteng “The Blueprint of Hynñiewtrep” kan sa ai ka jubab ïa kiba bun ki jingkylli kynthup ïa ki artylli ki jingkylli u Ardent, nga buh kumjuh kane kajuh ka jingkylli ïa u Ardent, kum ka jaidbynriew la u kwah ban shong ïingwai sah kumne ne u kwah ban shong ïing lajong???”.
