Nongpoh, Nohprah 22
Ha ka jingbteng ban wanrah ïa ka jingshngaiñ na ka bynta ki paidbah nongleit nongwan, ki pulit ka Ri Bhoi District hapoh ka jingïalam jong u Vivekanand Singh Rathore, Senior Superintendent of Police lem bad u Bah Orville Isaac Massar Additional Superintendent of Police ha ka sngi Nyngkong ki la mih surok biang ban talasi ïa ki kali pynkheiñ aiñ ha ka surokbah National Highway 6 kaba dang hap ha ka shnong Quinine.
Ha kane ka jingtalasi, ar tylli ki kali kit pisa jong ki bank kiba pyndonkam beaiñ ïa ka Siren khlem da ïoh jingbit, kila shah bat ha ki pulit bad shah law ruh ïa katei ka Siren nalor ka jingshah daiñ kuna katba ïa kito ki kali kiba tah ïit ïong, ki pulit ki la tar mardor khlem jingmap satia.
Nalor kiwei-kiwei de ki jingpynkheiñ aiñ, ki bor pulit ki la ïoh ruh ban bat ïa ar tylli ki kali kiba pyndonkam bakla ïa ka jingthoh ‘Government of Meghalaya’ bad Government of India, Ministry of Power’ ha trai jong u registration number jong kitei ki kali shimet, ki pulit ki la pyndam noh mardor ïa kitei ki jingthoh bad mana ruh ba nangne shakhmat ym dei satia ban pyndonkam bakla ïa kum kine ki jingthoh kiba long beaiñ.
Lyngba kane ka jingtalasi kali, ki pulit ka Ri Bhoi kila kren shai ba kin nym shim shuti ban lehkmen Khristmas lane Snem Thymmai, hynrei ba kin ïai bteng ban mih surok ban talasi ïa ki kali pynkheiñ aiñ na ka bynta ban wanrah ïa ka jingshngaiñ bad ka shongsuk shongsaiñ na ka bynta ki paidbah nongleit nongwan bad ka Jylla hi baroh kawei.
Shuh shuh, ha kane ka sngi, u SSP ka Ri Bhoi, u Vivekanand Singh Rathore u ban sa leit shimti noh shen ïa ka kam Deputy Inspector General of Police ka Eastern Range u la ai ruh ïa ka syrnod ïaroh sha ka VDP jong ka shnong Quinine kiba la ai ïa ka jingïatreilang pura ryngkat bad ki bor pulit naduh ka jingtalasi kali haduh ki kam pynduh jait ïa ki kam sniew bapher-bapher ha ka imlang ka sahlang.
