Shillong, K’Lyngkot 09
Ka Meghalaya Commer-cial Truck Owners and Drivers Association (MCTODA) ka la pynpaw ïa ka jingsngewnguh ïa ka Ïingbishar kaba la bthah ïa ki karkhana dewbilat ban ai ïa ka dor T.8 1-kilomitar ban kit ïa ki mar sha ki trai trok.
Ka kynhun ka la mynjur bad ai khublei ïa ka jingbishar bniah ka Ïingbishar kaba la ai ïa ka hukum kaba ïahap katkum ka jingdonkam ki ar liang mamla.
Ïa kane la pynpaw da u Chairman ka MCTODA, u Bah Mossklandar Marngar haba kren sha ki lad pathai khubor ha ka sngi Thohdieng jong ka taïew.
U Bah Mossklandar Marngar u la ong ba ka Ïingbishar kam pynduna eh ïa ka dor lane kam pyntam, hynrei ka la ai ïa ka dor kaba long pdeng bad kaba biang ba lah ban ïa im lang baroh.
“Ki trai karkhana dewbilat ki la dawa T.7 bad ka seng hi ka la dawa na ka Sorkar kumba T.9 ka bai kit mar sha ki trok hynrei mynta pat ka Ïingbishar ba donburom ka la ai T.8. Kane ka long kaba biang eh bad kam pynïap shuh ïa ki trai bad nongñiah trok” la ong u Bah Mossklandar.
U la ong ruh “Ngim shym la khmih lynti ba ka Ïingbishar kan bishar hok halor kane ka kam namar na ka liang ki karkhana dewbilat ki la leit sha Ïingbishar hynrei ka Ïingbishar mynta ka la bthah ba ki dei ban siew T.8”.
“Kane ka la long kaba ïa biang lang, ka long ka ban ïa im lang bad ka la long kaba beit ba ngin ïa kit ïa ki mar. Ngi ngeit skhem ba ki karkhana dewbilat ki dei ban pyntreikam hok ïa kane ka hukum jong ka Ïingbishar bad ma ngi ruh ngin burom lang, khnang ba kan nym shah ktah shuh nangne shakhmat,” ong u Bah Mossklandar.
Nalorkata, u la ong ruh ba kane kan dei ka sien kaba kut ban ïakren bad ki karkhana dewbilat hynrei lada jia ba kim shym la burom ïa ka hukum ka Ïingbishar, ka seng kan sa mih ban pynlong jingïakhih.
