Tura, K’Lyngkot 09
Ha kawei ka jingjia kaba la pynkyndit ïa baroh, uwei u briew u la khlad noh katba uwei pat u don hapdeng ka jingshitom jur hadien ka jingïakynad hapdeng ar kynhun hajan ka shnong Rajabala ha West Garo Hills (WGH) ha ka Sngi Thohdieng ha ka por kumba 3 baje mynsngi.
Katkum ka tyllong khubor na ki pulit, la ong ba kawei ka kynhun hynne mynsngi ka la leit ban jurip ïa kawei ka jaka tih maw be-aiñ hajan Rajabala bad dei ha ka por ba la wanphai ba ki dkhot katei ka kynhun ki la shah thombor ha kawei ka kynhun harud ka surok AMPT.
Katei ka kynhun (ki dkhot ka ACHIK) ka la shah pynsangeh ha ki nongthombor kiba la sdang ban shoh ban dat ïa ki hadien ka jing-ïa-nia. La shoh ïa ki da ki dieng bad ki maw. Katba kiba bun na ki, ki la lait phet na katei ka jingshah thombor, arngut kim shym la donbok bad ki la ngat ha katei ka jingshah thombor.
Hadien katei ka jingïakynad, ïa kitei ki 2 ngut kiba la mynsaw jur la pynkit noh mar-mar sha Tura Civil Hospital ha kaba uwei na ki u la khlad noh wat hapdeng ki jingpyrshang katba lah na ka liang ki nongsumar.
Katba ki jingtip ba bniah kim pat long kiba shai halor ka daw kaba la ïalam sha katei ka jingïakynad, hynrei ki tyllong khubor na ki pulit ki la pyntikna ïa katei ka jingjia bad la pynlong ruh ïa ka jingtohkit ba mardor halor kane.
“Ngi dang bishar bniah ïa kane ka kam bad watla ngim pat shai bha halor kaei kaba la ïalam sha kane ka jingïakynad, hynrei shen ngin sa ïoh ïa ki jingtip ba bniah. Kane ka kam ka don hapdeng ka jingtohkit ba bniah bad ngi kyrmen skhem ba shen ngin sa lah ban kem ïa katto-katne,” ong u heh pulit ka distrik, u Abraham T. Sangma.
Ha kawei ka liang, ki tyllong khubor na katei ka thaiñ ki ïathuh ba ka jinglong-jingman mynta ka long kaba suk ba saiñ bad jai-jai.
