Shillong, K’Lyngkot 09
U Myntri Sorkar bad uba long ruh u MLA ka Amlarem Constituency, u Bah Lahkmen Rymbui u la pynpaw ïa ka jingsngewkhia haba ïadei ka jingshngaiñ ki nongshong shnong ka Jylla ha ki thaiñ khappud bad ka Ri Bangladesh namar ka jingbym don bor ka Sorkar ban peit ban khmih haba ïadei ka long ka man jong katei ka Ri.
Haba kren sha ki nongthoh khubor ha ka sngi Thohdieng, u Bah Lahkmen u la pynpaw ba u kwah ba ka ri Bangladesh kan wanphai noh sha ka jingshongsuk shongshngaiñ, u la pynpaw ruh ba ha u bnai Rymphang katei ka ri kan don ïa ka ilekshon ban jied ïa ki nongïalam bad ban ïoh noh ïa ka Sorkar ka ban peit ban synshar.
“Ngi kyrmen skhem ba ka ri Bangla ha kane ka ilekshon ban wan kan ïoh noh ïa ka Sorkar ka ban peit ïa ka shongsuk shongsaiñ bad ka ban peit ruh ïa ka khaïi pateng ba kan ïaid beit ïaid ryntih kum ha ki por ba mynshuwa.” la ong u Bah Lahkmen.
Shuh-shuh u la ong ba ym lah ban len, lada don ka huri hura ha ka ri Bangladesh ka don ka jingktah ïa jaidbynriew Khasi namarba da ki spah ngut ki khun samla ba na ka Jylla kiba leit pule doktor bad pyntbit ha katei ka ri, kumjuh ruh ka jingdon ki jaitbynriew Khasi-Jaiñtia kiba shong ba sah ha katei ka ri.
“Nga kyrmen skhem ba ka Sorkar ka ban synshar ha Ri Bangladesh kan dei ka ban peit lang ïa ka jingbit jingbiang lang jong baroh khamtam ha ki jaka khappud” u la ong.
U la ong ba lada kane ka jinghuri hura ha katei ka ri ka ïai-bteng sah, kan ktah jur ïa ka pule puthi bad ka ïoh ka kot jong katei ka ri.
U Bah Lahkmen haba ïadei bad ka jingshngaiñ ki bynta khappud u la kyntu ïa ki nongshong shnong ba kin ai ka jingïatreilang bad ki BSF bad ki pulit, kumjuh ba ki pulit bad ki bor pahara ha ki bynta khappud kin pynlong ïa ka jingpeitbniah, hynrei kam dei ban pynwit bad pynshitom ïa kito kiba leit ba wan ha ki thaiñ khappud.
U la ai ka jingïaroh ïa ki nongshong shnong ba ki long kiba peitngor na ka por sha ka por, kiba ju bat bad kem ïa ki mynder kiba wan rungtuh hapoh ka Ri, khamtam na ki bynta ka Jylla Meghalaya bad u la bynrap, “ka jingïatreilang ka dei kaba donkam na ka bynta ban lah ban tehlakam ïa ka jingwanrung ki bar ri”.
