Shillong, K’Lyngkot 09
Ka North Eastern Council (NEC) ka la pyllait ïa ka song pisa ba T.13,45,38,500 na ka bynta ki kam pynroi bapher bapher ha Meghalaya, da kaba pynleit jingmut ha ka kam jngohkai, ka kolshor, ki jingtei bad ka pule puthi.
Ki projek ki kynthup ïa ki jingtei kiba ïadei bad ka kam jngohkai ha Laitlyngkot, ka Cultural Complex ha Seng Khasi Ri Raid Laban bad ka Commercial Building ha Iewdak Laban Municipal Market.
La pyllait ruh ïa ka pisa ban tei ïa ki ïing skul ha bun tylli ki jaka kaba kynthup ïa ka RKM School (ha Laidiengsai, Mawrah, Laitryngew, Wahlong, Pynursla, Pomsohmen bad Nongkynrih) bad ban pynbha ïa ka rukom lum ïa ki ñuit bad ki jingtei ha ka surok ban rung sha Ïewduh.
La pyllait ïa ka T.3 klur hapoh jong ka NESIDS (Roads) ban shna pynbha ïa ki surok kaba kynthup ïa ka Shillong City sha Umroi Airport Road, ka ban ai jingmyntoi ïa ki 10 tylli ki shnong kaba don ïa ki nongshong shnong kumba 7,287 ngut.
Ha u Nohprah 2025, ka North Eastern Council (NEC) ka la pyllait ïa ka pisa kaba kot T.76,78,58,035, kaba kynthup ïa ka jingpyllait na ka bynta kiwei-kiwei ki jylla ka thaiñ Shatei Lammihngi (North East) ka ri bad kumjuh ruh ïa kiwei pat ki shnat treikam kiba don ha kylleng ka thaiñ Shatei Lammihngi.
Nalor kane, ka North Eastern Council (NEC) ka la pyllait ïa ka pisa kaba kot baroh T. 26,47,42,847 sha ka thaiñ bad kiwei-kiwei ki shnat treikam ha u tei u bnai.
Kane ka jingai jingkyrshan kadei kaba la pynïar ha kylleng ka thaiñ, halor ki sienjam kiba bun kiba la shim da ki Skulbah, ki jaka pule kiba leh ïa ki Research ne jingwad bniah, ki Corporation kiba kyrpang bad Cultural Organisation ha kylleng ka thaiñ Northeast.
Ki projek kiba heh ki kynthup ïa ka jingseng ïa ka kper rep soh Kiwi, ka jingai jingkyrshan ha ka pule puthi na ka bynta ki 91 ngut ki Boarder Scholars bad 622 ngut ki day scholars jong ki Jylla ka Northeast, ban tei ïa ka Banana Tissue Culture, ban ïada ïa ki jaka kiba la rim bha bad ban kyntiew ïa ka kamai kajih kaba lah ban ïai neh lyngba ka Geographical Indication (GI) Registration ïa ki 166 tylli ki mar rep bad ki tiar ki tiar ka thaiñ, ka jingseng ïa ka Pig Breeding Units (Phase-III), jingkyntiew ïa ka Medicinal bad Aromatic Plants (MAP) kaba ïadei ruh bad ki lad ban kamai jakpoh, ban thaw ïa ka jinglong jingman ha kaba ïadei bad ka sengkam sengjam ban kyntiew ïa ka kamai kajih ha nongkyndong, ka jingtei ïa ka Scientific Smoked Meat Production Units, ki kam pynroi bapher ha kaba ïadei bad ka rep ka riang ban kyntiew ïa ka jingri sniang bad dohkha bad kiwei-kiwei.
Kiwei-kiwei ki bym dei ki projek jong ki jingtei kiba kynthup ïa ki Seminar, Cultural Programmes, Youth Exchanges, Technology and Innovation, Academic and Linguistic Workshops bad ki jingpule halor ka Sustainable Development.
