Khliehriat, K’Lyngkot 09
Ki dkhot ka Tnad Anti Narcotics Task Force (ANTF) ryngkat ki pulit ka Khliehriat ha ka 09 tarik Kyllalyngkot ki la ïoh ban kem noh ïa uwei u nongkhaïi drok ha ryngkat u drok heroin na ka shnong kaba hap hapoh East Jaiñtia Hills.
Katkum ka khubor pulit la ïathuh ba hadien ba la ïoh ïa ka jingtip kaba thikna, ki pulit ki la ïoh ban bat noh ïa une u samla 23 snem rta uba kyrteng u Kheinkor Muliar, katba u dang wan da kawei ka kali Alto kaba don ïa u nombor ML06A 0621 najan ka shnong Mookympad.
Hadien ba la pynlong ïa ka jingtalasi ha ka jingïadon lang ki sakhi ki pulit ki la ïoh ban kurup noh ïa u drok heroin uba don ka jingkhia kaba 1.37-gram kynthup ïa ki thyrnia injek lem bad kiwei pat ki tiar.
Ki pulit ki la kem noh ïa une u samla hapoh ka kyndon Narcotic Drugs and Psychotropic Substances (NDPS) Act, bad ka jingtohkit ka dang ïaid shakhmat ban lapdien shuh-shuh ïa kiwei pat kiba donkti ha kane ka kam be-aiñ.
